امریکی ایوانِ نمائندگان نے قومی دفاعی اختیارات کا بل منظور کر لیا، دفاعی اخراجات اور اسرائیل سے عسکری تعاون میں توسیع کی منظوری

واشنگٹن: امریکی ایوانِ نمائندگان نے قومی دفاعی اختیارات سے متعلق بل کثرتِ رائے سے منظور کر لیا، جس میں دفاعی اخراجات کے لیے 1.15 ٹریلین ڈالر مختص کرنے کے ساتھ امریکا اور اسرائیل کے درمیان دفاعی تعاون کو مزید وسعت دینے کی شق بھی شامل ہے۔

بل کے حق میں 216 جبکہ مخالفت میں 212 ووٹ ڈالے گئے۔ یہ منظوری ایسے وقت میں سامنے آئی ہے جب امریکا اور ایران کے درمیان کشیدگی برقرار ہے اور خطے میں سکیورٹی صورتحال پر عالمی توجہ مرکوز ہے۔

منظور شدہ بل میں امریکا اور اسرائیل کی مسلح افواج کے درمیان دفاعی تعاون اور عسکری انضمام کو مزید مضبوط بنانے کی تجویز شامل کی گئی ہے، جس کا مقصد دونوں ممالک کے درمیان مشترکہ دفاعی صلاحیتوں اور تعاون کو فروغ دینا ہے۔

قومی دفاعی اختیارات سے متعلق یہ بل اب مزید غور و منظوری کے لیے امریکی سینیٹ کو بھیج دیا گیا ہے، جہاں اس پر بحث کے بعد حتمی فیصلہ کیا جائے گا۔