مشکل وقت میں دوستوں کو نہیں بھولیں گے، چین ہمیشہ ایران کے ساتھ کھڑا رہا: ایرانی سفیر

چین میں ایران کے سفیر عبدالرزاق رحمانی نے کہا ہے کہ تہران اپنے مشکل وقت میں ساتھ دینے والے دوستوں کو کبھی فراموش نہیں کرے گا اور چین نے ہمیشہ ایران کی حمایت اور مدد کی ہے۔

پریس کانفرنس کرتے ہوئے ایرانی سفیر کا کہنا تھا کہ ایران اور چین کے تعلقات وقت کے ساتھ مزید مستحکم ہوں گے اور دونوں ممالک مختلف شعبوں میں تعاون کو فروغ دے رہے ہیں۔

انہوں نے بتایا کہ ایرانی اور چینی وزرائے خارجہ کی حالیہ ملاقات میں دوطرفہ تعلقات، اقتصادی تعاون اور نئے شعبوں میں شراکت داری پر تفصیلی گفتگو ہوئی۔

ایرانی سفیر نے کہا کہ امریکا اور ایران کے درمیان مذاکرات کا سلسلہ جاری ہے اور ان مذاکرات کا مقصد مفاہمتی یادداشت کو حتمی شکل دینا ہے۔

آبنائے ہرمز کے قریب چینی آئل ٹینکر پر مبینہ حملے سے متعلق سوال کے جواب میں انہوں نے واضح کیا کہ ایران اپنے دوست اور اسٹریٹجک شراکت دار ممالک کے جہازوں کو کبھی نشانہ نہیں بنائے گا۔

انہوں نے زور دیا کہ تہران خطے میں استحکام، سفارتکاری اور باہمی احترام کی پالیسی پر کاربند ہے جبکہ چین کے ساتھ تعلقات ایران کی خارجہ پالیسی کا اہم حصہ ہیں۔