امریکی حملے کی صورت میں طے شدہ اہداف کو نشانہ بنائیں گے: ایرانی افواج کی دھمکی

(تہران)یہ انتباہ ایرانی فوج کے مرکزی کمانڈ خاتم الانبیا سینٹرل ہیڈکوارٹرز کی جانب سے جاری کیا گیا، جو امریکی صدر ڈونلڈ ٹرمپ اور امریکی فوجی قیادت کی جانب سے بار بار دی جانے والی دھمکیوں کے بعد سامنے آیا ہے۔

ترجمان کے مطابق ایرانی افواج مکمل طور پر تیار ہیں اور سو فیصد تیاری کی حالت میں موجود ہیں۔ انہوں نے کہا کہ اگر اسلامی جمہوریہ ایران کے خلاف کسی بھی قسم کی جارحیت کی گئی تو ایرانی فورسز فوری اور بھرپور انداز میں پہلے سے مقرر کردہ اہداف کو نشانہ بنائیں گی۔

ایرانی فوج کے ترجمان نے مزید کہا کہ ملکی دفاع کیلئے تمام ضروری اقدامات مکمل کر لیے گئے ہیں اور افواج ہر قسم کے خطرے سے نمٹنے کیلئے تیار ہیں۔

یہ بیان ایسے وقت میں سامنے آیا ہے جب امریکی صدر ڈونلڈ ٹرمپ نے پاکستان کی درخواست پر ایران کے ساتھ جنگ بندی میں توسیع کا اعلان کیا ہے جبکہ ایران کی بندرگاہوں پر امریکی بحری ناکہ بندی برقرار رکھنے کا بھی عندیہ دیا گیا ہے۔