امریکی حملے کی صورت میں فوری اور طاقتور جواب دیں گے: ایران کی امریکا کو دھمکی

(تہران) ایران نے امریکا کو خبردار کرتے ہوئے کہا ہے کہ کسی بھی نئی فوجی جارحیت کی صورت میں فوری، فیصلہ کن اور طاقتور جواب دیا جائے گا۔

ایرانی خبر رساں ایجنسی تسنیم کے مطابق ایران کی خاتم الانبیا بریگیڈ نے اپنے بیان میں کہا کہ اگر دوبارہ حملہ کیا گیا تو ایرانی فوج مکمل طور پر تیار ہے اور “ٹریگر دبانے” کے لیے ہر وقت تیار کھڑی ہے۔

خاتم الانبیا مرکزی ہیڈکوارٹرز کے کمانڈر میجر جنرل علی نے امریکا اور اس کے اتحادیوں کو خبردار کرتے ہوئے کہا کہ وہ کسی بھی نئی اسٹریٹجک غلطی یا غلط اندازے سے گریز کریں۔

انہوں نے کہا کہ ایران کی مسلح افواج پہلے سے زیادہ مضبوط، منظم اور مکمل طور پر تیار ہیں، جبکہ کسی بھی نئی جارحیت کے جواب کے لیے فوج کی انگلیاں ٹریگر پر ہیں۔

ایرانی کمانڈر نے مزید کہا کہ آئندہ کسی بھی اشتعال انگیزی یا حملے کا جواب ماضی کی فوجی جھڑپوں سے کہیں زیادہ شدید اور وسیع پیمانے پر دیا جائے گا۔