اپنے وطن کے ایک ایک انچ کا دفاع کریں گے، ٹرمپ کی دھمکیوں پر ایرانی صدر کا دوٹوک ردعمل

ایرانی صدر مسعود پزشکیان نے امریکی صدر ڈونلڈ ٹرمپ کی حالیہ دھمکیوں پر سخت ردعمل دیتے ہوئے کہا ہے کہ ایران اپنے وطن کے ایک ایک انچ کا دفاع کرے گا اور کسی بھی دباؤ کے سامنے نہیں جھکے گا۔

سرکاری ٹی وی پر نشر ہونے والے اپنے بیان میں ایرانی صدر نے امریکی صدر کی بیان بازی پر تنقید کرتے ہوئے کہا کہ ڈونلڈ ٹرمپ بتائیں کہ آیا وہ میدانِ جنگ میں اپنے مقاصد حاصل کرنے میں کامیاب ہوئے ہیں؟ انہوں نے سوال اٹھایا کہ ایران کو تقسیم کرنے کی کوشش کرنے والوں نے آخر کیا حاصل کیا ہے؟

مسعود پزشکیان نے کہا کہ ایرانی قوم اپنے عملی اقدامات کے ذریعے ملک کے ایک ایک انچ کا دفاع کرے گی اور قومی خودمختاری پر کوئی سمجھوتہ نہیں کیا جائے گا۔

ادھر ایرانی پارلیمنٹ کی قومی سلامتی کمیٹی کے ترجمان ابراہیم رضائی نے کہا کہ دشمن مفاہمتی یادداشت کی تمام شقوں کی خلاف ورزی کرتے ہوئے باضابطہ طور پر جنگ میں داخل ہو چکا ہے، اس لیے اب وہ مفاہمتی یادداشت مؤثر نہیں رہی۔

دوسری جانب ایرانی پارلیمنٹ نے آبنائے ہرمز کی سلامتی اور پائیدار ترقی سے متعلق سٹریٹجک ایکشن پلان بھی منظور کر لیا، جسے خطے کی موجودہ صورتحال کے تناظر میں اہم پیش رفت قرار دیا جا رہا ہے۔