ایران کی مذاکرات میں شرکت غیر یقینی، حتمی فیصلہ تاحال سامنے نہ آ سکا

(تہران) ایران کی جانب سے امریکا کے ساتھ مذاکرات کے اگلے دور میں شرکت کے حوالے سے غیر یقینی صورتحال برقرار ہے، جبکہ ایرانی سرکاری میڈیا کا کہنا ہے کہ تہران کے پاس فی الحال مذاکرات میں شرکت کا کوئی واضح منصوبہ نہیں۔

ایرانی سرکاری ٹی وی کے مطابق حکام نے دعویٰ کیا ہے کہ نام نہاد بحری ناکہ بندی کا جاری رہنا، جنگ بندی کی مبینہ خلاف ورزیاں اور امریکا کی دھمکی آمیز زبان مذاکراتی عمل میں پیش رفت کو سست کر رہی ہیں۔

ایرانی میڈیا کی دیگر رپورٹس میں بھی اسی مؤقف کو دہرایا گیا ہے، تاہم حکام کا کہنا ہے کہ یہ ضروری نہیں کہ ایران مذاکرات میں شرکت نہ کرے اور صورتحال میں تبدیلی بھی ممکن ہے۔

اب تک کسی نامزد ایرانی عہدیدار نے مذاکرات کے دوسرے دور میں شرکت یا بائیکاٹ کے حوالے سے باضابطہ تصدیق یا تردید نہیں کی۔

یہ صورتحال ایسے وقت میں سامنے آئی ہے جب امریکی صدر ڈونلڈ ٹرمپ نے اعلان کیا تھا کہ امریکی وفد جلد پاکستان پہنچے گا تاکہ ایران کے ساتھ مذاکرات کے اگلے مرحلے پر بات چیت کی جا سکے۔

سفارتی حلقوں کے مطابق ایران کی شرکت یا عدم شرکت کا حتمی فیصلہ آئندہ چند گھنٹوں میں سامنے آنے کا امکان ہے، جبکہ خطے میں کشیدگی کے باعث عالمی توجہ ممکنہ مذاکرات پر مرکوز ہے۔