حکومت اور پیپلز پارٹی کا بڑا بریک تھرو، وفاقی بجٹ 10 جون 2026 کو پیش ہوگا

(اسلام آباد) حکومت اور پاکستان پیپلز پارٹی کے درمیان آئندہ مالی سال کے وفاقی بجٹ کے حوالے سے بڑا بریک تھرو سامنے آگیا۔ اہم مشاورتی اجلاس میں دونوں جانب سے وفاقی بجٹ 10 جون 2026 کو پیش کرنے پر اتفاق کر لیا گیا ہے۔

ترجمان کے مطابق نائب وزیراعظم و وزیر خارجہ اسحاق ڈار اور وزیر خزانہ محمد اورنگزیب نے پیپلز پارٹی کی قیادت سے ملاقات کی، جس میں آئندہ مالی سال کے بجٹ، ترقیاتی منصوبوں اور ملکی معاشی ترجیحات پر تفصیلی تبادلہ خیال کیا گیا۔

اجلاس کے دوران موجودہ اخراجات، ترقیاتی بجٹ اور پبلک سیکٹر ڈویلپمنٹ پروگرام (PSDP) کے تحت جاری اور مجوزہ منصوبوں کا جائزہ لیا گیا۔ مالیاتی استحکام، عوامی فلاح، روزگار کے مواقع اور جامع اقتصادی ترقی کے اہداف پر بھی غور کیا گیا۔

ملاقات میں مالی سال 2026-27 کی معاشی حکمت عملی، ترقیاتی ترجیحات اور بجٹ اہداف پر تفصیلی مشاورت کی گئی۔ دونوں جماعتوں نے متفقہ طور پر وزیراعظم کو سفارش کرنے کا فیصلہ کیا کہ وفاقی بجٹ بدھ 10 جون 2026 کو قومی اسمبلی میں پیش کیا جائے۔

اجلاس میں وزیراعلیٰ سندھ مراد علی شاہ، نوید قمر، شیری رحمان اور سلیم مانڈوی والا سمیت دیگر رہنما شریک ہوئے۔ سندھ کے ترقیاتی اور آبی منصوبوں سے متعلق امور بھی زیر بحث آئے۔

سیکرٹری خزانہ امداد اللہ بوسال اور چیئرمین ایف بی آر راشد محمود لنگڑیال نے بجٹ سے متعلق تفصیلی بریفنگ دی، جبکہ حکومت اور اتحادی جماعتوں کے درمیان مشاورتی عمل جاری رکھنے پر بھی اتفاق کیا گیا۔

ذرائع کے مطابق عوامی فلاح، ترقیاتی منصوبوں کی تکمیل اور معاشی استحکام کو آئندہ وفاقی بجٹ کی بنیادی ترجیحات قرار دیا گیا ہے، جبکہ بجٹ کی تیاری کے سلسلے میں اتحادی جماعتوں سے مشاورت آخری مرحلے میں داخل ہو چکی ہے۔