جمائما گولڈ اسمتھ نے دوسری شادی کی تصاویر سوشل میڈیا پر شیئر کردیں

لندن: سابق وزیراعظم عمران خان کی سابقہ اہلیہ اور فلم پروڈیوسر جمائما گولڈ اسمتھ نے بزنس مین کیمرون او ریلی کے ساتھ اپنی دوسری شادی کی تصدیق کرتے ہوئے شادی کی تصاویر سوشل میڈیا پر شیئر کردی ہیں۔

جمائما نے اپنی انسٹاگرام پوسٹ میں شادی کی تصاویر شیئر کیں، جن میں ان کے دونوں بیٹے اور قریبی دوست بھی ان کے ہمراہ دکھائی دیے۔ انہوں نے پوسٹ میں شادی کی تاریخ 12 ستمبر 2026 درج کرتے ہوئے اس دن کو خاص اور خوشیوں بھرا بنانے والے تمام افراد کا شکریہ ادا کیا۔

اس سے قبل برطانوی میڈیا نے رپورٹ کیا تھا کہ 52 سالہ جمائما نے 62 سالہ کیمرون او ریلی کے ساتھ گزشتہ ہفتے کے آخر میں شادی کی ہے۔ تاہم اب جمائما کی جانب سے تصاویر شیئر کیے جانے کے بعد شادی کی باضابطہ تصدیق ہوگئی ہے۔

کیمرون او ریلی کون ہیں؟

کیمرون او ریلی آئرش نژاد آسٹریلوی بزنس مین اور سرمایہ کار ہیں۔ وہ آنجہانی میڈیا ٹائیکون اور سابق بین الاقوامی رگبی کھلاڑی سر انتھونی او ریلی کے بیٹے ہیں۔

کیمرون نے آکسفورڈ یونیورسٹی سے تعلیم حاصل کی اور اپنے پیشہ ورانہ کیریئر کے ایک حصے کے دوران اپنے والد کے کاروباری اداروں میں کام کیا۔ بعد ازاں انہوں نے نجی سرمایہ کاری کے شعبے میں قدم رکھا۔

رپورٹس کے مطابق انہوں نے 2003 میں نجی سرمایہ کاری فنڈ بیارڈ کیپیٹل قائم کیا اور سوئٹزرلینڈ کی میٹرنگ کمپنی لینڈس اینڈ گائر حاصل کی، جس کے چیف ایگزیکٹیو بھی رہے۔ بعد میں 2011 میں توشیبا نے یہ کمپنی تقریباً 2.3 ارب ڈالر میں خرید لی۔

جمائما اور کیمرون کی ملاقات کیسے ہوئی؟

رپورٹس کے مطابق جمائما اور کیمرون کی ملاقات اس وقت ہوئی جب کیمرون مختلف ڈاکیومنٹریز اور فلموں میں ایگزیکٹیو پروڈیوسر کے طور پر کام کر رہے تھے۔

دونوں کی ابتدائی طور پر دوستی ہوئی، جو بعد میں رومانوی تعلق میں تبدیل ہوگئی۔ جمائما کے ایک قریبی دوست کے مطابق دونوں ایک دوسرے کو کافی عرصے سے جانتے ہیں اور ان کی ملاقات کام کے سلسلے میں ہوئی تھی۔

جمائما کی یہ دوسری شادی ہے۔ اس سے قبل ان کی شادی عمران خان سے ہوئی تھی، تاہم دونوں نے 2004 میں علیحدگی اختیار کرلی تھی۔