لکی مروت میں بڑا آپریشن: سکیورٹی فورسز کی کارروائی میں متعدد دہشتگرد ہلاک، ٹھکانے تباہ، اسلحہ برآمد

لکی مروت: خیبر پختونخوا کے ضلع لکی مروت میں سکیورٹی فورسز نے انٹیلی جنس بیسڈ آپریشن کے دوران دہشتگردوں کے متعدد ٹھکانوں کو نشانہ بناتے ہوئے کئی دہشتگرد ہلاک کر دیے، جبکہ ان کے قبضے سے بھاری مقدار میں اسلحہ، گولہ بارود اور دیگر سامان بھی برآمد کر لیا گیا۔

سکیورٹی ذرائع کے مطابق یہ کارروائیاں خیبر پختونخوا میں عزمِ استحکام ویژن کے تحت جاری انٹیلی جنس بیسڈ آپریشنز کا حصہ ہیں۔ آپریشن کے دوران دہشتگردوں کے متعدد ٹھکانے تباہ کیے گئے اور کئی شدت پسند مارے گئے۔

ذرائع کا کہنا ہے کہ ہلاک دہشتگردوں سے بھاری مقدار میں اسلحہ، گولہ بارود اور دیگر جنگی سامان بھی برآمد کیا گیا، جبکہ کارروائی کے دوران متعدد دہشتگردوں کے زخمی ہونے کی اطلاعات بھی موصول ہوئی ہیں۔

سکیورٹی ذرائع کے مطابق آپریشن کے دوران اس بات کو یقینی بنایا گیا کہ مقامی آبادی کے جان و مال کا مکمل تحفظ کیا جائے اور شہریوں کو کسی قسم کا نقصان نہ پہنچے۔ فورسز کا کہنا ہے کہ خیبر پختونخوا میں پائیدار امن کے قیام اور دہشتگردی کے مکمل خاتمے تک کارروائیاں بلا تعطل جاری رہیں گی۔

ذرائع نے بتایا کہ گزشتہ دو ماہ کے دوران خیبر پختونخوا کے مختلف اضلاع میں انٹیلی جنس اطلاعات کی بنیاد پر متعدد کامیاب کارروائیاں کی گئی ہیں، جن میں کئی دہشتگرد ہلاک اور ان کے محفوظ ٹھکانے تباہ کیے گئے۔

اسی سلسلے میں شمالی وزیرستان کے علاقے کٹھی کلی میں بھی سکیورٹی فورسز نے کارروائی کرتے ہوئے دہشتگردوں کے متعدد ٹھکانے تباہ کیے۔ اس آپریشن میں بھاری مقدار میں اسلحہ، گولہ بارود اور دیگر سامان برآمد کیا گیا، جبکہ دیسی ساختہ بم بھی ناکارہ بنا دیے گئے۔ ذرائع کے مطابق کارروائیوں میں زمینی دستوں کے ساتھ کواڈ کاپٹرز کا بھی استعمال کیا گیا۔

علاوہ ازیں باجوڑ کے علاقے شاکرو میں بھی سکیورٹی فورسز نے مؤثر کارروائی کرتے ہوئے دہشتگردوں کے ٹھکانوں کو نشانہ بنایا، جس کے نتیجے میں دہشتگردوں کو بھاری نقصان پہنچا۔