افغان سرزمین پاکستان کے خلاف استعمال ہو رہی ہے، دہشتگردوں کے خلاف مؤثر کارروائی ناگزیرہے، خواجہ آصف

(بشکیک)کرغزستان کے شہر بشکیک میں شنگھائی تعاون تنظیم وزرائے دفاع کانفرنس سے خطاب کرتے ہوئے خواجہ آصف نے کہا کہ سب سے زیادہ تشویش کالعدم ٹی ٹی پی اور بی ایل اے جیسے دہشتگرد گروہوں کے افغان سرزمین کے مسلسل استعمال پر ہے۔

انہوں نے زور دیا کہ خطے میں امن و استحکام کیلئے الزام تراشی، نفرت انگیز سیاست اور اندرونی سیاسی فائدے کیلئے بیانیہ سازی ترک کرنا ہوگی۔ امن کے قیام کیلئے شفافیت، اعتماد سازی اور باہمی تعاون کو ترجیح دینا ضروری ہے۔

وزیر دفاع نے کہا کہ پاکستان کے خلاف منفی پروپیگنڈا سیاسی مقاصد، پوشیدہ عزائم اور بدنیتی پر مبنی رہا ہے، جبکہ دہشتگردی کے خاتمے کیلئے پاکستان کی قربانیوں اور کامیابیوں کو نظرانداز کرنا حقائق سے آنکھیں بند کرنے کے مترادف ہے۔

خواجہ آصف کا کہنا تھا کہ پاکستان نے دہشتگردی کے خلاف صرف کھوکھلے نعرے نہیں لگائے بلکہ عملی اقدامات کیے اور بے مثال قربانیوں کے ساتھ انسداد دہشتگردی کیلئے اپنی ذمہ دارانہ وابستگی ثابت کی۔

انہوں نے مزید کہا کہ زمینی حقائق اس بات کی گواہی دیتے ہیں کہ وسیع تر علاقائی سلامتی کیلئے پاکستان کی خدمات ناقابلِ فراموش ہیں۔