رمشا خان نے خوشحال خان کے ساتھ نکاح کی وائرل تصویر پر خاموشی توڑ دی

پاکستانی شوبز انڈسٹری کی معروف اداکارہ رمشا خان نے سوشل میڈیا پر اپنی مبینہ نکاح کی تصاویر وائرل ہونے پر خاموشی توڑ دی اور خوشحال خان کے ساتھ شادی سے متعلق خبروں پر ردعمل دے دیا۔

تفصیلات کے مطابق حال ہی میں رمشا خان اور خوشحال خان کی مبینہ نکاح کی تصاویر سوشل میڈیا پر تیزی سے وائرل ہوئیں، جس کے بعد دونوں کی شادی سے متعلق قیاس آرائیوں نے زور پکڑ لیا۔

اس صورتحال پر ردعمل دیتے ہوئے رمشا خان نے انسٹاگرام اسٹوری کے ذریعے وضاحتی بیان جاری کیا۔ اداکارہ نے کہا کہ ان کی اجازت کے بغیر تصاویر کا منظر عام پر آنا غیر اخلاقی عمل ہے اور یہ ان کی نجی زندگی کی سنگین خلاف ورزی ہے۔

رمشا خان نے واضح کیا کہ ان کی ذاتی تصاویر کو رضامندی کے بغیر شیئر کیا گیا، جو ان کے لیے تکلیف دہ اور غیر پیشہ ورانہ رویہ ہے۔ انہوں نے ویوز اور کلکس کے لیے نجی لمحات کو خبر بنانے والے سوشل میڈیا پیجز کو مخاطب کرتے ہوئے کہا، "یہ ہماری زندگی ہے، آپ کی سرخیاں نہیں۔"

اداکارہ نے تمام سوشل میڈیا پلیٹ فارمز سے مطالبہ کیا کہ وائرل تصاویر فوری طور پر ہٹا دی جائیں اور آئندہ انہیں دوبارہ شیئر نہ کیا جائے۔

رمشا خان نے مداحوں کو یقین دلایا کہ وہ اپنی زندگی کے اس نئے مرحلے سے متعلق تفصیلات مناسب وقت پر خود شیئر کریں گی، جس کے بعد ان کی اور خوشحال خان کی شادی سے متعلق قیاس آرائیوں کو مزید تقویت مل گئی ہے۔