اسرائیل اور لبنان جنگ بندی میں 45 روز کی توسیع، واشنگٹن مذاکرات کے بعد بڑا اعلان

(واشنگٹن )امریکی محکمہ خارجہ کے ترجمان کے مطابق جنگ بندی میں توسیع خطے میں استحکام اور کشیدگی کم کرنے کی جانب ایک اہم قدم ہے۔ ترجمان نے بتایا کہ اسرائیل اور لبنان کے درمیان مذاکرات کا اگلا دور 2 اور 3 جون کو منعقد ہوگا۔

واشنگٹن مذاکرات کے بعد لبنانی وفد نے اپنے بیان میں کہا کہ وہ موجودہ جنگ بندی سے پیدا ہونے والی پیش رفت کو مستقل امن معاہدے میں تبدیل کرنا چاہتا ہے۔ لبنانی حکام کے مطابق امریکا کی سہولت کاری سے قائم ہونے والا سکیورٹی فریم ورک شہریوں کو ریلیف فراہم کرے گا، ریاستی اداروں کو مضبوط بنائے گا اور خطے میں دیرپا استحکام کیلئے سیاسی راستہ ہموار کرے گا۔

دوسری جانب امریکا میں اسرائیل کے سفیر نے مذاکرات کو “کھلے اور تعمیری” قرار دیتے ہوئے کہا کہ بات چیت میں اتار چڑھاؤ آتے رہتے ہیں، تاہم کامیابی کے امکانات روشن ہیں۔ انہوں نے سوشل میڈیا پلیٹ فارم ایکس پر اپنے بیان میں کہا کہ اسرائیل کی اولین ترجیح اپنے شہریوں اور فوجیوں کی سلامتی کو یقینی بنانا ہے۔

تجزیہ کاروں کے مطابق جنگ بندی میں توسیع سے نہ صرف سرحدی کشیدگی میں کمی آسکتی ہے بلکہ مشرق وسطیٰ میں ایک بڑے تصادم کے خطرات بھی وقتی طور پر ٹل سکتے ہیں۔