خودکش حملہ آور کو روکنے والے لیاقت شہید کیلئے ستارۂ شجاعت کی منظوری

وزیراعظم پاکستان کی سفارش پر صدرِ مملکتآصف علی زرداری نے لیاقت شہید کیلئے پاکستان کے اعلیٰ سول اعزاز “ستارۂ شجاعت” کی منظوری دے دی۔

یاد رہے کہ لیاقت شہید نے اپنی جان قربان کر کے ایک بڑے سانحے کو ٹال دیا تھا۔ انہوں نے خودکش حملہ آور کے ناپاک عزائم کے سامنے ڈٹ کر غیر معمولی بہادری، فرض شناسی اور حب الوطنی کا مظاہرہ کیا، جسے پوری قوم سلام پیش کر رہی ہے۔

حکومتی اعلامیے کے مطابق وزیراعظم کی سفارش اور صدر پاکستان کی منظوری قومی ہیرو کی عظیم قربانی کا باقاعدہ اعتراف ہے۔ حکام کا کہنا ہے کہ لیاقت شہید کی جرأت اور قربانی دہشتگردی کے خلاف قوم کے غیر متزلزل عزم کی علامت ہے۔

واضح رہے کہ “ستارۂ شجاعت” پاکستان کا دوسرا بڑا سول اعزاز برائے بہادری ہے، جو غیر معمولی جرات اور قومی خدمات انجام دینے والوں کو دیا جاتا ہے۔

دوسری جانب لیاقت شہید کے اہل خانہ اعزاز وصول کرنے کیلئے اسلام آباد روانہ ہو گئے ہیں۔ شہید کی والدہ، صاحبزادے اور بھائی صدر پاکستان سے یہ اعزاز وصول کریں گے۔

حکام کے مطابق اہل خانہ کو مکمل سرکاری پروٹوکول کے ساتھ اسلام آباد بھیجا گیا، جبکہ ایلیٹ فورس کا خصوصی دستہ بھی ان کی سکیورٹی اور سہولت کیلئے ہمراہ ہے۔ اس موقع پر اے سی جنڈ بھی اہل خانہ کے ساتھ موجود رہے۔

وزیراعظم پاکستان کی سفارش پر منظور ہونے والا ستارۂ شجاعت آج شام لیاقت شہید کے اہل خانہ کے حوالے کیا جائے گا۔

لیاقت شہید کی قربانی کو محض ایک اعزاز نہیں بلکہ پوری قوم کی جانب سے سلام اور عقیدت کا اظہار قرار دیا جا رہا ہے۔