سونے کی قیمت میں بڑی کمی، فی تولہ ہزاروں روپے سستا ہوگیا

کاروباری ہفتے کے پانچویں روز ملک میں سونے کی قیمت میں نمایاں کمی ریکارڈ کی گئی ہے، جس کے بعد فی تولہ سونا 4 لاکھ 56 ہزار 736 روپے کا ہوگیا۔

آل پاکستان جیمز اینڈ جیولرز ایسوسی ایشن کے مطابق آج سونے کی فی تولہ قیمت میں 5 ہزار 600 روپے کی کمی ہوئی۔ اسی طرح 10 گرام سونے کی قیمت بھی 4 ہزار 801 روپے کم ہوکر 3 لاکھ 91 ہزار 577 روپے ہوگئی۔

سونے کی قیمت میں اتار چڑھاؤ کی بڑی وجوہات میں عالمی مارکیٹ میں سونے کے نرخ، امریکی ڈالر کی قدر، عالمی معاشی صورتحال اور جغرافیائی کشیدگی شامل ہیں۔ عالمی سطح پر غیر یقینی صورتحال کے دوران سرمایہ کار سونے کو محفوظ سرمایہ کاری سمجھتے ہیں، جس سے اس کی طلب اور قیمت متاثر ہوتی ہے۔

اس کے علاوہ عالمی شرحِ سود میں کمی یا مستقبل میں شرحِ سود کم ہونے کی توقعات بھی سونے کی قیمت پر اثر انداز ہوتی ہیں۔ پاکستان میں عالمی نرخوں کے ساتھ روپے اور ڈالر کی شرحِ تبادلہ بھی مقامی مارکیٹ میں سونے کی قیمت کے تعین میں اہم کردار ادا کرتی ہے۔