معرکۂ حق کا ایک سال مکمل: پاک افواج کا دوٹوک پیغام، ہر جارحیت کا جواب پہلے سے زیادہ طاقت سے دیا جائے گا

(اسلام آباد) معرکۂ حق کے ایک سال مکمل ہونے پر پاکستان کی مسلح افواج نے اس عزم کا اعادہ کیا ہے کہ پاکستان کے خلاف کسی بھی جارحیت یا دشمنانہ عزائم کا جواب پہلے سے زیادہ طاقت، درستگی اور غیر متزلزل عزم کے ساتھ دیا جائے گا۔

پاک افواج کی جانب سے جاری خصوصی پیغام میں کہا گیا کہ معرکۂ حق قومی دفاع کی تاریخ کا ایک فیصلہ کن اور تاریخی باب ثابت ہوا، جس نے نہ صرف قومی اعتماد کو نئی توانائی دی بلکہ پاک فضائیہ کی جدید جنگی تیاریوں اور پیشہ ورانہ صلاحیتوں کو بھی عالمی سطح پر نمایاں کیا۔

آئی ایس پی آر کے مطابق معرکۂ حق کے دوران انجام دیے گئے آپریشنز فضائی جنگ کی تاریخ میں منفرد، غیر معمولی اور اعلیٰ پیشہ ورانہ مہارت کا مظہر تھے۔ اعلامیے میں کہا گیا کہ پاک فضائیہ جدید ٹیکنالوجی، اسمارٹ سسٹمز اور جدید جنگی حکمت عملی کے ذریعے مستقبل کی ایک موثر فضائی قوت کے طور پر ابھر رہی ہے۔

اعلامیے میں مزید کہا گیا کہ ملٹی ڈومین آپریشنز میں مہارت نے پاک فضائیہ کو جدید فضائی جنگ کے تقاضوں سے ہم آہنگ ایک مضبوط اور فیصلہ کن فورس بنا دیا ہے۔ پاک فضائیہ کی کامیابیوں نے پاکستانی قوم کے اعتماد، حوصلے اور جذبۂ حب الوطنی کو مزید مستحکم کیا۔

پاک افواج نے اپنے پیغام میں واضح کیا کہ پاکستان ایک امن پسند ملک ہے اور اس کی مسلح افواج ذمہ دارانہ اور پختہ اسٹریٹجک سوچ کی حامل ہیں۔ پاکستان کی ہر دفاعی تیاری اور ہر صلاحیت کا مقصد خطے میں امن، استحکام اور سلامتی کا فروغ ہے۔

بیان میں کہا گیا کہ پاک افواج خطے کی بدلتی جیوپولیٹیکل صورتحال اور دشمن کی جارحانہ عسکری تیاریوں پر گہری نظر رکھے ہوئے ہیں، جبکہ مستقبل کے چیلنجز سے نمٹنے کے لیے جدید ٹیکنالوجی، جنگی مہارت اور پیشہ ورانہ صلاحیتوں میں مسلسل سرمایہ کاری کی جا رہی ہے۔

پاک افواج نے اس عزم کا بھی اظہار کیا کہ مستقبل کے جنگی ماحول کے لیے پاکستان کی مسلح افواج پہلے سے زیادہ تیار، مرکوز اور مکمل طور پر مستعد ہیں۔

پیغام کے اختتام پر پوری قوم کی جانب سے پاک فضائیہ کے جوانوں، افسران اور اہلکاروں کو ان کی پیشہ ورانہ مہارت، قربانی اور تاریخی دفاعی کردار پر خراج تحسین پیش کیا گیا۔ اعلامیے میں کہا گیا کہ پاک فضائیہ اپنی جدید جنگی صلاحیتوں، غیر متزلزل عزم اور پیشہ ورانہ برتری کی بدولت دنیا کی بہترین فضائی افواج میں نمایاں مقام رکھتی ہے اور ہمیشہ “Second to None” رہے گی۔