نیویارک میں “معرکۂ حق” کی پہلی سالگرہ کی پروقار تقریب، پاکستان کی امن اور خودمختاری سے وابستگی کا اعادہ

( نیویارک ) تقریب میں پاکستانی اور کشمیری کمیونٹی کے افراد، سماجی و سیاسی رہنماؤں، ماہرینِ تعلیم اور سول سوسائٹی کے نمائندوں نے بڑی تعداد میں شرکت کی۔

تقریب کا آغاز قومی ترانے سے ہوا، جس کے بعد ایک خصوصی دستاویزی فلم پیش کی گئی جس میں معرکۂ حق کی تاریخی کامیابی اور پاک افواج کی بہادری، پیشہ ورانہ مہارت اور قربانیوں کو خراجِ تحسین پیش کیا گیا۔

اپنے افتتاحی خطاب میں نیویارک میں پاکستان کے قونصل جنرل عامر احمد اتوزئی نے کہا کہ معرکۂ حق پاکستان کی تاریخ کا ایک اہم سنگِ میل تھا جس نے قوم کے اتحاد، استقامت اور ملکی خودمختاری و علاقائی سالمیت کے دفاع کے غیر متزلزل عزم کو دنیا پر واضح کیا۔ انہوں نے وطن کے شہداء اور غازیوں کو خراجِ عقیدت پیش کرتے ہوئے پاک افواج کی پیشہ ورانہ صلاحیتوں اور جرات کو سراہا۔

انہوں نے کہا کہ پاکستان امن، مذاکرات اور خطے کے استحکام کے لیے پُرعزم ہے، تاہم کسی بھی جارحیت کے خلاف اپنے قومی مفادات کے دفاع کی مکمل صلاحیت رکھتا ہے۔

تقریب سے سینیٹر رانا محمود الحسن، پاکستان پالیسی انسٹی ٹیوٹ کے چیئرمین ڈاکٹر غلام مجتبیٰ، ورلڈ کشمیر اویئرنیس فورم کے سیکریٹری جنرل ڈاکٹر غلام نبی فائی، کمیونٹی رہنما علی راشد اور کشمیری کارکن تاج خان نے بھی خطاب کیا۔

مقررین نے کہا کہ معرکۂ حق کی کامیابی پاکستانی قوم کے اتحاد، استقامت اور اجتماعی عزم کی عکاس ہے۔ انہوں نے ملکی دفاع اور سلامتی کے لیے دی جانے والی قربانیوں کو زبردست خراجِ تحسین پیش کیا۔

مقررین نے مسئلہ جموں و کشمیر پر پاکستان کے اصولی مؤقف کا اعادہ کرتے ہوئے کہا کہ جنوبی ایشیا میں دیرپا امن اور استحکام کا انحصار اقوامِ متحدہ کی سلامتی کونسل کی قراردادوں اور کشمیری عوام کی خواہشات کے مطابق مسئلہ کشمیر کے پُرامن حل سے مشروط ہے۔

اپنے اختتامی خطاب میں اقوامِ متحدہ میں پاکستان کے مستقل مندوب سفیر عاصم افتخار احمد نے کہا کہ معرکۂ حق نے پاکستان کی سیاسی بصیرت، تحمل اور باوقار امن کے عزم کو اجاگر کیا۔ انہوں نے کہا کہ پاکستان علاقائی امن، کثیرالجہتی تعاون اور بین الاقوامی قانون کی پاسداری کے لیے پُرعزم ہے جبکہ اپنی خودمختاری اور علاقائی سالمیت کے دفاع کی مکمل صلاحیت بھی رکھتا ہے۔

انہوں نے بیرونِ ملک مقیم پاکستانی اور کشمیری کمیونٹی کے کردار کو سراہتے ہوئے کہا کہ انہوں نے پاکستان کا مؤقف مؤثر انداز میں دنیا کے سامنے اجاگر کرنے اور ملک کا مثبت تشخص مضبوط بنانے میں اہم کردار ادا کیا ہے۔

تقریب کے اختتام پر پاکستان کی ترقی، خوشحالی اور سلامتی کے لیے خصوصی دعا کی گئی۔