مریم نواز کا لاہور میں پنجاب فلم سٹی بنانے کا اعلان، 50 ایکڑ پر جدید میڈیا حب قائم ہوگا

وزیراعلیٰ پنجاب مریم نوازنے لاہور میں پنجاب فلم سٹی کے قیام کا بڑا اعلان کر دیا ہے، جو ملکی فلمی صنعت کے لیے ایک اہم پیش رفت قرار دیا جا رہا ہے۔

حکومتی اعلامیے کے مطابق یہ منصوبہ نواز شریف آٹی سٹی کے اندر 50 ایکڑ اراضی پر قائم کیا جائے گا، جو پاکستان کا پہلا مکمل اینڈ ٹو اینڈ میڈیا پروڈکشن حب ہوگا۔

وزیراعلیٰ مریم نواز کا کہنا ہے کہ جدید ٹیکنالوجی اور وسائل کو بروئے کار لاتے ہوئے پاکستان کی فلم، ٹی وی اور اینیمیشن انڈسٹری کو ایک نئی زندگی دی جائے گی۔ اس فلم سٹی میں ان شعبوں سے وابستہ افراد کے لیے تمام سہولیات ایک ہی جگہ فراہم کی جائیں گی۔

منصوبے کے تحت عالمی معیار کے اسٹوڈیوز، ساؤنڈ اسٹیجز اور جدید پوسٹ پروڈکشن لیبارٹریز قائم کی جائیں گی، جبکہ شوٹنگ سیٹس، ایک مرکزی جھیل اور بڑے ایوارڈ شوز کے انعقاد کے لیے کنونشن ہال بھی تعمیر کیا جائے گا۔

وزیراعلیٰ کے مطابق اس منصوبے سے نہ صرف ہزاروں افراد کو روزگار کے مواقع میسر آئیں گے بلکہ ملک میں تخلیقی معیشت کو بھی فروغ حاصل ہوگا اور پاکستان کی فلمی صنعت عالمی سطح پر دوبارہ اپنی شناخت بنا سکے گی۔