آٹھ صفر کا معرکۂ حق دشمن کبھی فراموش نہیں کر پائے گا: مریم نواز

(لاہور) مریم نواز نے کہا ہے کہ آٹھ صفر کا معرکۂ حق دشمن کبھی فراموش نہیں کر پائے گا، جبکہ اس تاریخی کامیابی نے دنیا بھر میں پاکستان کی طاقت اور قومی اتحاد کو اجاگر کیا۔

وزیراعلیٰ پنجاب نے شہباز شریف، سید عاصم منیر، ظہیر احمد بابر سدھو اور نوید اشرف کو خراجِ تحسین پیش کرتے ہوئے کہا کہ پاکستان کی فتح اور بھارت کی شکست کی گواہی دنیا نے دی اور یہ حقیقت ہمیشہ یاد رکھی جائے گی۔

انہوں نے کہا کہ معرکۂ حق نے دشمن پر پاکستان کی ہیبت ثبت کر دی اور ثابت کیا کہ پاکستان امن پسند ملک ہے، تاہم وقت آنے پر بنیان مرصوص بن کر اپنے دفاع کی مکمل صلاحیت رکھتا ہے۔

مریم نواز کا کہنا تھا کہ معرکۂ حق تاریخِ عالم میں پاکستان کی عظمت کا روشن باب بن چکا ہے، جبکہ پوری قوم نے اتحاد اور یکجہتی کا مظاہرہ کرتے ہوئے دشمن کے سامنے سیسہ پلائی دیوار کی مانند کھڑے ہو کر دنیا کو واضح پیغام دیا۔

انہوں نے مزید کہا کہ پاک افواج اور پاکستانی عوام کے اتحاد نے دشمن کو سر جھکانے پر مجبور کر دیا، جبکہ بے باک قیادت نے اس تاریخی فتح کی بنیاد رکھی۔

وزیراعلیٰ پنجاب کے مطابق آج ملک بھر میں معرکۂ حق کی کامیابی کی خوشیاں منائی جا رہی ہیں، پنجاب کے ہر شہر، گاؤں اور گلی کوچے میں جشن کا ماحول ہے، جبکہ طلبہ، اساتذہ، تاجر، وکلا، کسان اور مختلف شعبہ ہائے زندگی سے تعلق رکھنے والے افراد اس کامیابی پر فخر کا اظہار کر رہے ہیں۔

انہوں نے کہا کہ پاکستان کے شاہینوں نے اپنی پیشہ ورانہ حربی مہارت کے ذریعے دشمن پر اپنی برتری ثابت کی اور قوم کا سر فخر سے بلند کر دیا۔