محمد بن سلمان کا منیٰ گرینڈ پیلس میں عالمی معززین کے اعزاز میں استقبالیہ، پاکستانی وفد کی شرکت

(مکہ مکرمہ) سعودی ولی عہد شہزادہ محمد بن سلمان نے منیٰ گرینڈ پیلس میں دنیا بھر سے آئے معزز مہمانوں کے اعزاز میں ایک خصوصی استقبالیہ تقریب کا اہتمام کیا، جس میں مختلف اسلامی ممالک کے نمائندوں، علمائے کرام اور حج انتظامات سے وابستہ شخصیات نے شرکت کی۔

پاکستان کی جانب سے استقبالیہ تقریب میں وفاقی وزیر مذہبی امور سردار محمد یوسف نے حکومتی نمائندگی کی، جبکہ محسن نقوی، حافظ طاہر اشرفی اور نہال ہاشمی بھی شریک ہوئے۔

تقریب میں ائمہ حرمین، انتظامی کمیٹیوں کے ذمہ داران اور ضیوفِ خادم الحرمین پروگرام کے مہمانوں نے بھی شرکت کی۔ اس موقع پر وزیر مذہبی امور سردار محمد یوسف نے محمد بن سلمان سے ملاقات کی اور بہترین حج انتظامات پر سعودی حکومت کا شکریہ ادا کیا۔

انہوں نے کہا کہ حجاج کرام کی خدمت اور انہیں جدید سہولیات کی فراہمی کے لیے سعودی حکومت کے اقدامات قابلِ تحسین ہیں۔ وزیر مذہبی امور نے شاہ سلمان بن عبدالعزیز اور ولی عہد محمد بن سلمان کے لیے نیک خواہشات کا اظہار بھی کیا۔

دریں اثنا، گورنر سندھ نہال ہاشمی نے بھی سعودی ولی عہد سے ملاقات کی اور پاکستانی عوام کے ساتھ سعودی قیادت کی محبت، حجاج کرام کے لیے مثالی انتظامات اور سعودی مہمان نوازی کو سراہا۔

نہال ہاشمی نے خادم الحرمین الشریفین شاہ سلمان بن عبدالعزیز اور ولی عہد محمد بن سلمان کی خدمات کو عالمِ اسلام کے لیے باعثِ فخر قرار دیتے ہوئے کہا کہ سعودی عرب کی قیادت مسلم امہ کی خدمت میں نمایاں کردار ادا کر رہی ہے۔

استقبالیہ تقریب حج سیزن کے دوران اسلامی ممالک کے درمیان بھائی چارے، تعاون اور باہمی روابط کے فروغ کی ایک اہم کڑی قرار دی جا رہی ہے۔