ایرانی صدر کی جنگ بندی میں پاکستان کے کردار کی تعریف، دوطرفہ تعاون بڑھانے پر زور

(تہران)ایرانی صدر ڈاکٹر مسعود پزشکیان نے جنگ بندی اور خطے میں امن کے قیام کیلئے پاکستان کے کردار کو سراہتے ہوئے دونوں برادر اسلامی ممالک کے درمیان دوطرفہ تعاون کو مزید وسعت دینے پر زور دیا ہے۔

ایرانی صدر سے پاکستان کے وزیر داخلہ محسن نقوی نے ملاقات کی جس میں پاک ایران تعلقات، خطے کی مجموعی صورتحال، سرحدی تعاون اور باہمی روابط کے فروغ پر تفصیلی تبادلہ خیال کیا گیا۔

ایرانی سرکاری خبر ایجنسی کے مطابق ڈاکٹر مسعود پزشکیان نے وزیراعظم شہباز شریف اور فیلڈ مارشل سید عاصم منیر کی امن و جنگ بندی کیلئے سفارتی کاوشوں کی تعریف کرتے ہوئے کہا کہ پاکستان نے خطے میں کشیدگی کم کرنے کیلئے مثبت اور ذمہ دارانہ کردار ادا کیا۔

ایرانی صدر نے امید ظاہر کی کہ پاکستان کی سفارتی کوششیں خطے میں دیرپا امن اور استحکام کے قیام میں اہم کردار ادا کریں گی۔ انہوں نے کہا کہ ایران اسلامی ممالک کے ساتھ مخلصانہ، مضبوط اور دیرینہ تعلقات کا خواہاں ہے۔

ڈاکٹر مسعود پزشکیان کا کہنا تھا کہ اسلامی ممالک کے درمیان اتحاد اور ہم آہنگی خطے میں بیرونی طاقتوں کی مداخلت کو کم کر سکتی ہے جبکہ مسلم ممالک کا اتفاق ہی پائیدار امن اور ترقی کی بنیاد بن سکتا ہے۔

انہوں نے پاکستان کی جانب سے سرحدی تجارت اور اقتصادی تعاون کے فروغ کیلئے اٹھائے گئے اقدامات کو بھی سراہا اور کہا کہ دونوں ممالک کے درمیان معاشی، تجارتی، سائنسی، تعلیمی، ثقافتی اور ٹیکنالوجی کے شعبوں میں تعاون کو مزید وسعت دی جا سکتی ہے۔

ایرانی صدر نے اس عزم کا اظہار بھی کیا کہ حالیہ علاقائی صورتحال کے باوجود ایران اور پاکستان پہلے سے زیادہ قریب آئے ہیں اور یہ وقت دونوں ممالک کے تعلقات کو مزید مستحکم بنانے کیلئے ایک بہترین موقع ہے۔

اس موقع پر وزیر داخلہ محسن نقوی نے کہا کہ پاکستان اور ایران کے تعلقات تاریخی، مذہبی اور ثقافتی بنیادوں پر قائم ہیں اور دونوں ممالک کے عوام ایک دوسرے کیلئے دلی احترام اور محبت رکھتے ہیں۔

انہوں نے کہا کہ تہران اور اسلام آباد کے برادرانہ تعلقات کو مزید فروغ دینا وقت کی اہم ضرورت ہے اور پاکستان ہر سطح پر ایران کے ساتھ تعاون بڑھانے کا خواہاں ہے۔