سسٹم ری سیٹ ہونے والا ہے، ملک میں بہتری آئے گی: محسن نقوی

لاہور: وفاقی وزیر داخلہ محسن نقوی نے کہا ہے کہ ملک کا سسٹم ری سیٹ ہونے والا ہے اور اس عمل کے بعد حالات میں بہتری آئے گی۔ تاہم، ملک کو ری سیٹ کرنے اور معاشی ترقی کی راہ پر گامزن کرنے کے لیے کاروباری برادری کو حکومت کا ساتھ دینا ہوگا۔

لاہور چیمبر آف کامرس میں ایک تقریب سے خطاب کرتے ہوئے محسن نقوی کا کہنا تھا کہ جب تک کاروباری طبقہ حکومت کے ساتھ تعاون نہیں کرے گا، ملک میں مثبت تبدیلی لانا ممکن نہیں ہوگا۔

وزیر داخلہ نے کہا کہ ملکی معیشت کی بہتری کا بنیادی حل برآمدات میں اضافہ ہے۔ ہمیں کسی نہ کسی طریقے سے اپنی ایکسپورٹس بڑھانا ہوں گی۔ اگر ایران اپنے ملک میں مختلف مصنوعات تیار کر سکتا ہے تو پاکستان ایسا کیوں نہیں کر سکتا؟ اس مقصد کے لیے باقاعدہ منصوبہ بندی کرنا ہوگی اور دوسرے ممالک کے تجربات سے بھی سیکھنا ہوگا۔

محسن نقوی نے لاہور چیمبر آف کامرس کے نمائندوں کو یقین دہانی کرائی کہ وہ کاروباری برادری کے تمام مسائل حل کرنے کے لیے تیار ہیں۔ انہوں نے بتایا کہ حکومت گزشتہ چند ماہ سے بزنس پاسپورٹ پر کام کر رہی ہے اور امید ہے کہ وہ وزیراعظم کے سامنے ایسا بزنس پاسپورٹ پیش کریں گے جس سے تاجروں اور کاروباری شخصیات کو سفری مشکلات کا سامنا نہیں کرنا پڑے گا۔

انہوں نے کہا کہ حکومت کاروباری طبقے کو سہولتیں فراہم کرنے اور برآمدات بڑھانے کے لیے اقدامات کر رہی ہے تاکہ ملکی معیشت کو مضبوط بنایا جا سکے۔