یورپی ممالک بھاری مقدار میں ڈیزل جاری کرنے پر تیار ہوگئے: ٹرمپ کا دعویٰ

واشنگٹن: امریکی صدر ڈونلڈ ٹرمپ نے دعویٰ کیا ہے کہ یورپی ممالک اپنے ڈیزل کے ذخائر سے بھاری مقدار میں ایندھن جاری کرنے پر تیار ہوگئے ہیں۔

ڈونلڈ ٹرمپ کے مطابق یورپ سے ڈیزل کی فراہمی فوری طور پر شروع کردی جائے گی۔ ان کا کہنا تھا کہ انہوں نے یورپی ممالک پر ڈیزل کے ذخائر جاری کرنے کے لیے دباؤ ڈالا تھا اور خبردار کیا تھا کہ اگر ڈیزل جاری نہ کیا گیا تو امریکا ان ممالک کو ڈیزل کی سپلائی روک دے گا۔

امریکی صدر نے جنوبی کوریا کے ساتھ توانائی کے شعبے میں ہونے والے معاہدے کا بھی ذکر کیا۔ ان کا کہنا تھا کہ جنوبی کوریا کے ساتھ 8.4 ارب ڈالر کا آئل ریکوری منصوبہ طے پایا ہے، جو مستقبل میں امریکی توانائی کے تحفظ کو مضبوط بنانے میں مدد دے گا۔

دوسری جانب فرانسیسی صدر کا کہنا ہے کہ جی7 ممالک آئندہ چار ماہ کے دوران 10 کروڑ بیرل ڈیزل اور خام تیل کی سپلائی پر رضامند ہوگئے ہیں۔

واضح رہے کہ ایران سے متعلق جاری تنازع کے باعث عالمی سطح پر ایندھن کی قیمتوں میں نمایاں اضافہ دیکھنے میں آرہا ہے۔ برطانیہ میں بھی ڈیزل کی قیمت پہلی مرتبہ 2 پاؤنڈ فی لیٹر کی ریکارڈ سطح تک پہنچ چکی ہے۔