ایشیائی ترقیاتی بینک کی پاکستان کے لیے 50 کروڑ ڈالر قرض کی منظوری، رقم پنشن اصلاحات پر خرچ ہوگی

ایشیائی ترقیاتی بینک نے پاکستان کے لیے 500 ملین ڈالر قرض کی منظوری دے دی۔ رقم وفاقی سول پنشن نظام میں اصلاحات، مالیاتی پائیداری اور حکومتی اخراجات کا دباؤ کم کرنے کے لیے استعمال ہوگی
اسلام آباد: ایشیائی ترقیاتی بینک (اے ڈی بی) نے پاکستان کے لیے 50 کروڑ ڈالر قرض کی منظوری دے دی ہے، جس کا مقصد وفاقی سول پنشن نظام میں اصلاحات اور اسے مالی طور پر پائیدار بنانا ہے۔
ایشیائی ترقیاتی بینک کے جاری کردہ اعلامیے کے مطابق پاکستان کے سالانہ وفاقی پنشن اخراجات ایک ہزار ارب روپے سے تجاوز کر چکے ہیں، جبکہ 2016 سے اب تک پنشن اخراجات میں تقریباً پانچ گنا اضافہ ریکارڈ کیا گیا ہے۔
اعلامیے میں کہا گیا ہے کہ پاکستان نے پنشن نظام کو مزید مضبوط اور پائیدار بنانے کے لیے اہم اقدامات کیے ہیں۔ منظور شدہ قرض کے ذریعے مجوزہ اصلاحات پر عمل درآمد اور وفاقی پنشن نظام کی مالیاتی پائیداری بہتر بنانے پر توجہ دی جائے گی۔
اے ڈی بی کے مطابق پنشن اخراجات میں مسلسل اضافے کے باعث قومی خزانے پر مالی دباؤ بڑھ رہا ہے، جس سے حکومتی وسائل کی دیگر اہم شعبوں میں فراہمی بھی متاثر ہوتی ہے۔
بینک کا کہنا ہے کہ پنشن نظام میں اصلاحات سے حکومتی مالی وسائل پر دباؤ کم کرنے میں مدد ملے گی، جبکہ ترقیاتی منصوبوں، تعلیم، صحت اور دیگر سماجی شعبوں کے لیے اضافی مالی گنجائش پیدا ہوسکے گی۔
50 کروڑ ڈالر کی اس مالی معاونت کو پاکستان کے سرکاری مالیاتی نظام میں بہتری اور طویل مدتی معاشی استحکام کی کوششوں کا حصہ قرار دیا جا رہا ہے۔
شائع ہوا: 17 نومبر، 2026 کو 08:57 AM
آخری تدوین: 17 نومبر، 2026



