خیبرپختونخوا اور بلوچستان میں سکیورٹی فورسز کی کارروائیاں، 11 دہشتگرد ہلاک

اسلام آباد: سکیورٹی فورسز نے خیبرپختونخوا اور بلوچستان میں کارروائیوں کے دوران 11 دہشتگردوں کو ہلاک کردیا۔

سکیورٹی ذرائع کے مطابق خیبرپختونخوا کے ضلع جنوبی وزیرستان میں انٹیلی جنس بیسڈ آپریشن کیا گیا، جس کے دوران فتنہ الخوارج کے 5 دہشتگرد ہلاک ہوئے۔

ذرائع کا کہنا ہے کہ کارروائی کے دوران دہشتگردوں کے ٹھکانوں کو تباہ کردیا گیا جبکہ ہلاک دہشتگردوں کے قبضے سے بڑی مقدار میں اسلحہ اور گولہ بارود بھی برآمد ہوا۔ انٹیلی جنس بیسڈ آپریشن کے دوران دہشتگردوں کو بھاری جانی و مالی نقصان پہنچایا گیا۔

دوسری جانب بلوچستان میں بھی سکیورٹی فورسز کی کارروائیاں جاری ہیں۔ گورندر اور ماشکیل کے علاقوں میں کارروائی کے دوران 6 دہشتگرد ہلاک ہوگئے۔

سکیورٹی ذرائع کے مطابق ماشکیل میں دہشتگردوں نے سکیورٹی چیک پوسٹ پر فائرنگ کی اور بعد ازاں فرار ہونے کی کوشش کی، تاہم سکیورٹی فورسز نے بروقت کارروائی کرتے ہوئے فرار ہونے والے دہشتگردوں کو ہلاک کردیا۔

ذرائع کا کہنا ہے کہ یہ کارروائیاں آپریشن ردالفتنہ 3 اور عزمِ استحکام وژن کے تحت کی گئیں۔ سکیورٹی فورسز نے ملک بھر سے دہشتگردی کے خاتمے اور پائیدار امن کے قیام کے عزم کا اعادہ کیا ہے۔