محسن نقوی کی روس سمیت 5 ممالک کے وزرائے داخلہ سے اہم ملاقاتیں، سیکیورٹی تعاون بڑھانے پر اتفاق

بشکیک میں شنگھائی تعاون تنظیم کے وزرائے داخلہ اجلاس کے موقع پر وفاقی وزیر داخلہ محسن نقوی نے روس، تاجکستان، ازبکستان، کرغزستان اور قازقستان کے وزرائے داخلہ سے الگ الگ ملاقاتیں کیں، جن میں باہمی تعاون، سیکیورٹی اور انسدادِ دہشت گردی کے امور پر تفصیلی تبادلہ خیال کیا گیا۔

محسن نقوی کی روسی وزیر داخلہ ولادیمیر کولوکولٹسیف سے ملاقات میں غیر قانونی امیگریشن کی روک تھام، غیر قانونی طور پر مقیم شہریوں کی وطن واپسی اور انسدادِ منشیات کے شعبوں میں تعاون بڑھانے کے معاہدوں پر دستخط کیے گئے۔

تاجکستان کے وزیر داخلہ رمضان رحیم زادہ کے ساتھ ملاقات میں افغانستان میں دہشت گرد تنظیموں کی سرگرمیوں، دہشت گردوں کے کیمپوں اور منشیات کی پیداوار سے پیدا ہونے والے سیکیورٹی خطرات پر گفتگو ہوئی۔ دونوں رہنماؤں نے اتفاق کیا کہ افغانستان میں دہشت گردی اور منشیات سے متعلق سرگرمیاں پورے خطے کے امن و استحکام کے لیے خطرہ ہیں۔

ازبکستان کے وزیر داخلہ عزیز تاشپولاتوف سے ملاقات کے دوران قانون نافذ کرنے والے اداروں کے درمیان تعاون اور مشترکہ تربیتی پروگراموں پر غور کیا گیا۔ دونوں ممالک نے رابطوں کو مزید مؤثر بنانے کے لیے مشترکہ ورکنگ گروپ قائم کرنے پر بھی اتفاق کیا۔

کرغزستان کے وزیر داخلہ نیاز بیکوف اولان اوموکانوچ کے ساتھ ملاقات میں مختلف شعبوں میں تعاون بڑھانے پر اتفاق کیا گیا۔ اس موقع پر محسن نقوی نے کرغزستان کو اقوام متحدہ کی سلامتی کونسل کا غیر مستقل رکن منتخب ہونے پر مبارکباد دی اور ایس سی او اجلاس کے بہترین انتظامات کو سراہا۔

قازقستان کے وزیر داخلہ یرژان سادینوف سے ملاقات میں غیر قانونی امیگریشن کی روک تھام اور سیکیورٹی تعاون کو مزید فروغ دینے پر اتفاق کیا گیا۔ دونوں ممالک نے وزارت داخلہ کی سطح پر مشترکہ ورکنگ گروپ کے قیام کا فیصلہ بھی کیا۔

ملاقاتوں میں خطے میں امن، سرحدی سلامتی، انسدادِ دہشت گردی اور منشیات کی روک تھام کے لیے مشترکہ کوششوں کو مزید مضبوط بنانے کے عزم کا اظہار کیا گیا۔