وزیر خزانہ محمد اورنگزیب کی ورلڈ بینک اور آئی ایم ایف کے بہار اجلاسوں میں شرکت

(واشنگٹن)وزارت خزانہ کے اعلامیے کے مطابق ملاقات کے دوران وزیر خزانہ نے اصلاحات اور ترقیاتی ایجنڈے کے لیے ورلڈ بینک کی مسلسل حمایت کو سراہا۔ دونوں فریقین نے سماجی تحفظ کے اقدامات کو مزید مضبوط بنانے کی ضرورت پر بھی اتفاق کیا۔

اعلامیے کے مطابق ملاقات میں کنٹری پارٹنرشپ فریم ورک کے تحت ہونے والی پیش رفت کا جائزہ لیا گیا، جبکہ مشرق وسطیٰ میں جاری تنازع کے پاکستان کی معیشت پر ممکنہ اثرات سے نمٹنے کے اقدامات پر بھی غور کیا گیا۔

وزیر خزانہ محمد اورنگزیب نے پاکستان کو درپیش آبادی سے متعلق چیلنجز پر بھی گفتگو کی اور اس سلسلے میں وفاق اور صوبوں کے درمیان بہتر ہم آہنگی کی ضرورت پر زور دیا۔

وزیر خزانہ نے ورلڈ بینک سے آبادی کے چیلنجز سے نمٹنے کے لیے جامع ماسٹر پلان کی تیاری میں تعاون کی درخواست بھی کی، جس پر ورلڈ بینک حکام نے مثبت ردعمل کا اظہار کیا۔