معروف عالمِ دین ناصر مدنی دورانِ خطاب اچانک گر پڑے، تشویشناک حالت میں اسپتال منتقل

جہانیاں: معروف مذہبی اسکالر علامہ ناصر مدنی نمازِ جمعہ سے قبل خطاب کے دوران اچانک طبیعت بگڑنے کے باعث بے ہوش ہو کر گر پڑے، جس کے بعد انہیں فوری طور پر طبی امداد فراہم کرتے ہوئے اسپتال منتقل کر دیا گیا۔

میڈیا رپورٹس کے مطابق علامہ ناصر مدنی جہانیاں کی ایک مسجد میں جمعہ سے قبل خطاب کر رہے تھے کہ اچانک ان کی طبیعت ناساز ہوگئی۔ عینی شاہدین کا کہنا ہے کہ طبیعت خراب ہونے سے قبل انہوں نے کلمۂ طیبہ پڑھا اور تیسری مرتبہ کلمہ پڑھتے ہوئے منبر پر گر پڑے۔

واقعے کے فوراً بعد مسجد میں موجود افراد نے انہیں ابتدائی طبی امداد فراہم کی، جس کے بعد پہلے مقامی اسپتال اور پھر مزید علاج کے لیے ملتان کے کارڈیالوجی اسپتال منتقل کر دیا گیا۔

ابتدائی اطلاعات میں دل کا دورہ پڑنے کا امکان ظاہر کیا گیا، تاہم اس حوالے سے حتمی طبی تشخیص ڈاکٹرز کی جانب سے جاری نہیں کی گئی۔ بعض رپورٹس کے مطابق ڈاکٹرز نے بتایا ہے کہ ان کی حالت پہلے سے بہتر ہے اور علاج جاری ہے۔

واقعے کی خبر سامنے آنے کے بعد ملک بھر سے ان کے چاہنے والوں نے علامہ ناصر مدنی کی جلد صحت یابی کے لیے دعاؤں کا اظہار کیا ہے، جبکہ سوشل میڈیا پر بھی ان کی صحت کے لیے نیک تمناؤں کا سلسلہ جاری ہے۔