نیشنل ایکشن پلان ایپکس کمیٹی کا اہم اجلاس، وزیراعظم شہباز شریف اور فیلڈ مارشل عاصم منیر شریک

نیشنل ایکشن پلان کی ایپکس کمیٹی کا اہم اجلاس، وزیراعظم شہباز شریف اور فیلڈ مارشل عاصم منیر شریک، بلوچستان کی امن و امان صورتحال پر غور

خبر:

وزیراعظم محمد شہباز شریف کی زیر صدارت نیشنل ایکشن پلان (NAP) کی صوبائی ایپکس کمیٹی کا اہم اجلاس کوئٹہ میں منعقد ہوا، جس میں بلوچستان کی امن و امان کی مجموعی صورتحال، دہشت گردی کے خلاف اقدامات اور صوبے میں سیکیورٹی کو مزید مؤثر بنانے کے حوالے سے تفصیلی غور کیا گیا۔

اجلاس میں چیف آف آرمی سٹاف اور چیف آف ڈیفنس فورسز فیلڈ مارشل سید عاصم منیر، گورنر بلوچستان جعفر خان مندوخیل، وزیراعلیٰ بلوچستان میر سرفراز بگٹی، قانون نافذ کرنے والے اداروں کے سربراہان اور اعلیٰ سول و عسکری حکام شریک ہوئے۔

اس موقع پر وفاقی وزیر اقتصادی امور احد خان چیمہ، وفاقی وزیر اطلاعات و نشریات عطا اللہ تارڑ اور وزیراعظم کے مشیر رانا ثناء اللہ بھی اجلاس میں موجود تھے۔

اجلاس کے دوران بلوچستان میں امن و امان کی موجودہ صورتحال، دہشت گردی کے خطرات، انسداد دہشت گردی کے اقدامات اور سیکیورٹی اداروں کے درمیان مزید مؤثر رابطہ کاری پر تفصیلی بریفنگ دی گئی۔ ذرائع کے مطابق اجلاس میں صوبے میں امن کے قیام اور دہشت گردی کے خاتمے کے لیے اہم پالیسی فیصلوں پر بھی غور کیا گیا۔

اس سے قبل وزیراعظم شہباز شریف ایک روزہ دورے پر کوئٹہ پہنچے جہاں گورنر بلوچستان جعفر خان مندوخیل، وزیراعلیٰ میر سرفراز بگٹی اور اعلیٰ سول و عسکری حکام نے ان کا استقبال کیا۔ وزیراعظم کے ہمراہ وفاقی وزیر احد خان چیمہ، عطا اللہ تارڑ اور رانا ثناء اللہ بھی موجود تھے۔

حکومتی ذرائع کے مطابق اجلاس میں کیے جانے والے فیصلوں کا مقصد بلوچستان میں امن و استحکام کو مزید مضبوط بنانا اور دہشت گردی کے خلاف جاری قومی حکمت عملی کو مؤثر انداز میں آگے بڑھانا ہے۔

۔