فنکاروں کی حمایت میں نواز شریف سب سے آگے رہے:وسیم عباس

پاکستان کے سینئر اداکار وسیم عباس نے سابق وزیراعظم نواز شریف کی فنکاروں کے لیے خدمات کو سراہتے ہوئے کہا ہے کہ ان جیسی حمایت آج تک کسی حکمران نے فراہم نہیں کی۔

ایک پوڈکاسٹ میں گفتگو کرتے ہوئے وسیم عباس کا کہنا تھا کہ نواز شریف ہمیشہ آرٹسٹ کمیونٹی کے ساتھ کھڑے رہے اور مشکل وقت میں ان کی مدد کرتے رہے۔ انہوں نے دعویٰ کیا کہ حتیٰ کہ جلاوطنی کے دوران بھی وہ فنکاروں کی خیریت دریافت کرتے رہتے تھے۔

اداکار کے مطابق، کئی مواقع پر نواز شریف نے خاموشی سے بیمار فنکاروں کی مالی مدد کی، بعض کو علاج کے لیے سہولیات فراہم کیں اور کسی قسم کی تشہیر کے بغیر مدد جاری رکھی۔ انہوں نے کہا کہ ایسے اقدامات کو سراہا جانا چاہیے نہ کہ تنقید کا نشانہ بنایا جائے۔

وسیم عباس نے مزید کہا کہ اگر کوئی شخصیت فلاحی کام کر رہی ہو تو اس پر بلاوجہ تنقید نہیں ہونی چاہیے، بلکہ مثبت پہلوؤں کو بھی تسلیم کرنا ضروری ہے۔