امریکی دباؤ پر نیتن یاہو کا بڑا فیصلہ، لبنان میں اسرائیلی فوجی کارروائیاں روکنے کی ہدایت

(تل ابیب/بیروت) اسرائیلی وزیراعظم بن یامین نیتن یاہو نے امریکی مشاورت کے بعد فوج کو لبنان میں حملے روکنے اور جنگ بندی پر عمل درآمد کی ہدایت جاری کر دی ہے، تاہم جنوبی لبنان میں قائم اسرائیلی سیکیورٹی زونز بدستور برقرار رہیں گے۔

اسرائیلی میڈیا رپورٹس کے مطابق وزیراعظم نیتن یاہو اور وزیر دفاع اسرائیل کاٹز نے چیف آف اسٹاف لیفٹیننٹ جنرل ایال زمیر کی سربراہی میں سیکیورٹی صورتحال کا جائزہ لینے کے بعد یہ فیصلہ کیا۔ اسرائیل کے چینل 12 نے دعویٰ کیا ہے کہ یہ فیصلہ امریکا کے ساتھ قریبی رابطوں اور مشاورت کے بعد کیا گیا۔

رپورٹس کے مطابق اسرائیلی فوج کو جنوبی لبنان میں مبینہ خطرات کے خاتمے کے لیے کارروائی کا اختیار برقرار رہے گا، جبکہ اسرائیلی حکام کا کہنا ہے کہ اگر حزب اللہ نے جنگ بندی کی خلاف ورزی کی تو سخت ردعمل دیا جائے گا۔

دوسری جانب لبنان کی سول ڈیفنس ایجنسی نے بتایا ہے کہ جنوبی لبنان کے ضلع نباطیہ میں اسرائیلی فضائی حملوں کے نتیجے میں کم از کم 16 افراد جاں بحق اور 12 زخمی ہوئے ہیں۔ امدادی ٹیموں نے متاثرہ علاقوں سے لاشیں اور زخمیوں کو قریبی اسپتالوں میں منتقل کیا۔

لبنان کی سرکاری خبر رساں ایجنسی (این این اے) کے مطابق ہفتے کی صبح تک اسرائیلی فضائیہ نے جنوبی لبنان کے ایک درجن سے زائد مقامات کو نشانہ بنایا، جن میں نباطیہ اور اس کے گرد و نواح کے علاقے بھی شامل تھے۔ حملوں کے نتیجے میں رہائشی آبادیوں کو شدید نقصان پہنچا۔

تجزیہ کاروں کے مطابق لبنان میں کارروائیاں محدود کرنے کا اسرائیلی فیصلہ خطے میں بڑھتی ہوئی کشیدگی کم کرنے کی کوشش قرار دیا جا رہا ہے، جبکہ امریکا بھی جنگ کے پھیلاؤ کو روکنے کے لیے سفارتی سرگرمیاں تیز کر چکا ہے۔

ادھر لبنانی حکام نے عالمی برادری سے مطالبہ کیا ہے کہ شہری علاقوں پر حملوں کا نوٹس لیا جائے اور جنگ بندی کو مؤثر بنانے کے لیے عملی اقدامات کیے جائیں۔