شمالی وزیرستان میں سکیورٹی فورسز کی بڑی کارروائی، مطلوب خارجی کمانڈر سمیت 5 دہشت گرد ہلاک

شمالی وزیرستان میں سکیورٹی فورسز نے ایک بڑی کارروائی کرتے ہوئے انتہائی مطلوب خارجی کمانڈر سمیت 5 دہشت گردوں کو ہلاک کر دیا۔

سکیورٹی ذرائع کے مطابق انٹیلی جنس بیسڈ آپریشن کے دوران دہشت گرد سرغنہ خارجی عمر عرف جان میر عرف ثاقب تور اپنے 4 ساتھیوں سمیت مارا گیا۔ ذرائع کا کہنا ہے کہ دہشت گرد کمانڈر کے سر کی قیمت 30 لاکھ روپے مقرر تھی۔

سکیورٹی حکام کے مطابق ہلاک دہشت گرد فتنہ الخوارج کا اہم کمانڈر تھا جو سکیورٹی فورسز اور شہریوں پر ہونے والے متعدد دہشت گرد حملوں کا ماسٹر مائنڈ سمجھا جاتا تھا۔

ذرائع نے بتایا کہ خارجی عمر عرف ثاقب تور نے سپین وام میں بوبالی مسجد کے اطراف زیر زمین بنکرز، سرنگیں اور بارودی جال بچھا رکھے تھے تاکہ سکیورٹی فورسز کی پیش قدمی کو روکا جا سکے۔

سکیورٹی فورسز نے مربوط حکمت عملی کے تحت علاقے کا محاصرہ کیا اور شدید مقابلے کے بعد تمام دہشت گردوں کو ہلاک کر دیا۔

دفاعی ماہرین کے مطابق فتنہ الخوارج کے اہم دہشت گرد کمانڈر کی ہلاکت سے علاقے میں امن و استحکام کے قیام میں مدد ملے گی۔ ان کا کہنا ہے کہ انٹیلی جنس بیسڈ آپریشن میں اس اہم سرغنہ کی ہلاکت دہشت گرد تنظیم کے لیے بڑا دھچکا ہے۔

ماہرین کے مطابق آپریشن عزم استحکام کے تحت فتنہ الخوارج اور فتنہ الہندوستان کے خلاف کارروائیاں کامیابی سے جاری ہیں اور سکیورٹی فورسز دہشت گردی کے خاتمے کے لیے پُرعزم ہیں۔