26 نومبر احتجاج کیس: عدالت نے عمر ایوب کو اشتہاری قرار دے کر دائمی وارنٹ گرفتاری جاری کر دیے
اسلام آباد کی ڈسٹرکٹ اینڈ سیشن کورٹ نے 26 نومبر احتجاج کیس میں پی ٹی آئی رہنما عمر ایوب کو اشتہاری قرار دیتے ہوئے ان کے دائمی وارنٹ گرفتاری جاری کر دیے۔ مقدمہ تھانہ سیکرٹریٹ میں دفعہ 144 کی خلاف ورزی سمیت دیگر دفعات کے تحت درج ہے
اسلام آباد کی ڈسٹرکٹ اینڈ سیشن کورٹس نے 26 نومبر کے احتجاج سے متعلق مقدمے میں پاکستان تحریک انصاف (پی ٹی آئی) کے رہنما عمر ایوب کو اشتہاری قرار دیتے ہوئے ان کے دائمی وارنٹ گرفتاری جاری کر دیے۔
جوڈیشل مجسٹریٹ شائستہ کنڈی نے مقدمے کی سماعت کی، جس کے دوران عدالت کی جانب سے مسلسل طلبی کے باوجود عمر ایوب پیش نہ ہوئے۔
عدالت نے مسلسل غیر حاضری پر انہیں اشتہاری قرار دیتے ہوئے دائمی وارنٹ گرفتاری جاری کرنے کا حکم دیا۔
یاد رہے کہ عمر ایوب کے خلاف اسلام آباد کے تھانہ سیکرٹریٹ میں 26 نومبر کے احتجاج کے سلسلے میں مقدمہ درج ہے، جس میں ان پر دفعہ 144 کی خلاف ورزی سمیت دیگر متعلقہ دفعات کے تحت الزامات عائد کیے گئے ہیں۔
عدالتی حکم کے بعد قانون نافذ کرنے والے ادارے وارنٹ گرفتاری پر عملدرآمد کے لیے قانونی کارروائی کریں گے، جبکہ مقدمے کی آئندہ سماعت مقررہ تاریخ پر ہوگی۔
شائع ہوا: 18 جولائی، 2026 کو 06:52 AM
آخری تدوین: 18 جولائی، 2026
