بھارتی ٹیمیں دوطرفہ اسپورٹس مقابلوں کیلئے پاکستان نہیں جائیں گی، بھارتی وزارت کھیل

(نئی دہلی) بھارتی وزارت کھیل نے واضح کیا ہے کہ بھارتی ٹیمیں دوطرفہ اسپورٹس مقابلوں کیلئے پاکستان کا دورہ نہیں کریں گی، جبکہ پاکستانی کھلاڑی اور ٹیمیں بھارت میں منعقد ہونے والے کثیرالملکی ایونٹس میں شرکت کر سکیں گی۔

بھارتی وزارت کھیل کے مطابق پاکستان اور بھارت کے درمیان دوطرفہ کھیلوں کے مقابلے فی الحال ممکن نہیں ہوں گے اور دونوں ممالک کی ٹیمیں ایک دوسرے کے ملک میں دوطرفہ سیریز یا مقابلوں کیلئے سفر نہیں کریں گی۔

وزارت کے بیان میں کہا گیا کہ بھارت عالمی اور کثیرالملکی کھیلوں کے ایونٹس میں بین الاقوامی کھیلوں کے اصولوں اور ذمہ داریوں پر عمل کرے گا، جس کے تحت پاکستانی کھلاڑیوں کو شرکت کی اجازت دی جائے گی۔

یاد رہے کہ پاکستان اور بھارت کے درمیان سیاسی کشیدگی کے باعث دونوں ممالک کے کھیلوں کے تعلقات گزشتہ کئی برسوں سے محدود ہیں۔

2012 کے بعد سے پاکستان اور بھارت کی کرکٹ ٹیموں کے درمیان کوئی دوطرفہ سیریز نہیں کھیلی گئی، جبکہ دونوں روایتی حریف صرف آئی سی سی اور ایشین کرکٹ کونسل کے ایونٹس میں ایک دوسرے کے مدمقابل آتے ہیں۔

دونوں ٹیموں کے درمیان حالیہ بین الاقوامی مقابلے بھی نیوٹرل وینیوز پر منعقد کیے جاتے رہے ہیں۔

کھیلوں کے ماہرین کے مطابق پاک بھارت تعلقات میں کشیدگی کے باعث کھیلوں کی سرگرمیاں مسلسل متاثر ہو رہی ہیں، حالانکہ دونوں ممالک کے درمیان مقابلوں کو دنیا بھر میں غیر معمولی دلچسپی حاصل ہوتی ہے۔