پاکستان اور قطر کی سفارتکاری کامیاب، لبنان جنگ کے خاتمے اور ایران پر تیل پابندیاں ختم کرنے میں اہم پیشرفت

(تہران / برگن سٹاک )ایران کے وزیر خارجہ عباس عراقچی نے پاکستان اور قطر کی سفارتی کوششوں کو سراہتے ہوئے کہا ہے کہ دونوں ممالک کی ثالثی کے نتیجے میں لبنان جنگ کے خاتمے اور خطے میں کشیدگی کم کرنے کے حوالے سے اہم پیشرفت حاصل ہوئی ہے۔

ایرانی وزیر خارجہ نے پاکستان کے دفتر خارجہ کی جانب سے جاری کردہ ایران امریکہ مذاکرات کے مشترکہ اعلامیے کو سوشل میڈیا پلیٹ فارم ایکس پر شیئر کرتے ہوئے کہا کہ سوئٹزرلینڈ میں ہونے والے مذاکرات نے امن اور استحکام کی جانب مثبت راستہ ہموار کیا ہے۔

عباس عراقچی کے مطابق ایران کی تیل اور پیٹروکیمیکل برآمدات پر عائد پابندیاں ختم کر دی گئی ہیں جبکہ بعض منجمد ایرانی اثاثے بھی بحال کر دیے گئے ہیں، جس سے ایرانی معیشت کو اہم ریلیف ملنے کی توقع ہے۔

انہوں نے مزید کہا کہ آبنائے ہرمز پر بحری ناکہ بندی ختم کر دی گئی ہے اور ایران کی ترقی، بحالی اور تعمیر نو کے لیے ایک بڑے منصوبے کا آغاز بھی کیا جائے گا۔

اس سے قبل ایرانی وزارت خارجہ نے اپنے بیان میں کہا تھا کہ مذاکرات کے دوران حتمی معاہدے کے لیے بنیادی فریم ورک پر بات چیت کی گئی اور دوسرے فریق کی ذمہ داریوں پر عملدرآمد کے حوالے سے حوصلہ افزا پیشرفت سامنے آئی ہے۔

یاد رہے کہ سوئٹزرلینڈ کے شہر برگن سٹاک میں ایران اور امریکہ کے درمیان مذاکرات کے بعد پاکستان اور قطر نے مشترکہ اعلامیہ جاری کیا تھا۔ اعلامیے کے مطابق فریقین نے مذاکراتی عمل کی نگرانی کے لیے اعلیٰ سطحی کمیٹی کے قیام، حتمی معاہدے کے لیے 60 روزہ روڈ میپ کی منظوری اور مختلف تکنیکی ورکنگ گروپس کے قیام پر اتفاق کیا ہے۔

تجزیہ کاروں کے مطابق اگر یہ پیشرفت عملی شکل اختیار کرتی ہے تو نہ صرف مشرق وسطیٰ میں کشیدگی کم ہو سکتی ہے بلکہ عالمی توانائی منڈیوں اور خطے کی معاشی صورتحال پر بھی مثبت اثرات مرتب ہوں گے۔