پاکستان نے فلسطین میں پائیدار امن کیلئے اسرائیلی قبضے کا خاتمہ ناگزیر قرار دے دیا

نیویارک: پاکستان نے فلسطین میں پائیدار امن کے قیام کے لیے اسرائیلی قبضے کے خاتمے کو ناگزیر قرار دیتے ہوئے آزاد فلسطینی ریاست کے قیام پر زور دیا ہے۔

پاکستانی مستقل مندوب عاصم افتخار احمد نے اجلاس سے خطاب کرتے ہوئے کہا کہ فلسطین میں اسرائیلی غیر قانونی آبادکاری کا سلسلہ بدستور جاری ہے، جبکہ جنگ بندی کے بعد بھی 1200 سے زائد فلسطینی شہید کیے جا چکے ہیں۔

انہوں نے سوال اٹھایا کہ اگر جنگ بندی برقرار ہے تو فلسطینی علاقوں میں حملے کیسے جاری ہیں؟

غیر قانونی آبادکاری اور جبری بے دخلی کا خاتمہ ضروری

عاصم افتخار احمد نے کہا کہ غیر قانونی آبادکاری، آبادکاروں کا تشدد اور فلسطینیوں کی جبری بے دخلی کا سلسلہ ختم کرنا ضروری ہے۔

ان کا کہنا تھا کہ سلامتی کونسل کے تمام ارکان مقبوضہ فلسطینی علاقوں کے الحاق کو مسترد کرتے ہیں، جبکہ جنگی جرائم اور دیگر سنگین جرائم کے ذمہ داروں کا احتساب یقینی بنایا جانا چاہیے۔

پاکستانی مستقل مندوب نے واضح کیا کہ پائیدار امن کے لیے اسرائیلی قبضے کا خاتمہ ناگزیر ہے۔ پاکستان فلسطینی عوام کے ساتھ اپنی غیر متزلزل یکجہتی کا اعادہ کرتا ہے اور فلسطینیوں کے حق خودارادیت کی جائز جدوجہد میں ان کے ساتھ کھڑا ہے۔

آزاد فلسطینی ریاست کا قیام ضروری

عاصم افتخار احمد کے مطابق خطے میں پائیدار امن کی واحد راہ منصفانہ اور جامع امن کا قیام ہے۔ اس مقصد کے لیے آزاد فلسطینی ریاست کا قیام ضروری ہے۔

انہوں نے کہا کہ فلسطینی ریاست 1967 سے قبل کی سرحدوں پر قائم ہونی چاہیے، جبکہ اس کا دارالحکومت القدس الشریف ہونا چاہیے۔

پاکستان نے ایک بار پھر اس مؤقف کا اظہار کیا کہ مسئلہ فلسطین کا پائیدار حل فلسطینی عوام کے بنیادی حقوق، حق خودارادیت اور ایک آزاد فلسطینی ریاست کے قیام سے ہی ممکن ہے۔