پاکستان کرکٹ کے مسائل کی جڑ عاقب جاوید ہیں، جیسن گلیسپی

سابق ٹیسٹ ہیڈ کوچ جیسن گلیسپی نے عاقب جاوید کو پاکستان کرکٹ کے موجودہ مسائل کا ذمہ دار قرار دیتے ہوئے شدید تنقید کی ہے۔

جیسن گلیسپی کا کہنا ہے کہ عاقب جاوید پاکستان کرکٹ بورڈ میں سلیکٹرز کے چیئرمین ہیں اور گزشتہ دو سال سے اپنا عہدہ برقرار رکھے ہوئے ہیں، جبکہ وہ اور گیری کرسٹن پی سی بی کے ساتھ دو سال بھی مکمل نہیں کرسکے۔

سابق ہیڈ کوچ نے کہا کہ عاقب جاوید کو اپنے عہدے پر دو سال ہوچکے ہیں اور وہ دعویٰ کرتے ہیں کہ پاکستان کی کارکردگی میں بہتری آئی ہے، تاہم ان کے دور میں پاکستان تینوں فارمیٹس کی رینکنگ میں نیچے گیا۔

گلیسپی نے خبردار کیا کہ اگر ان کے خلاف منفی گفتگو کا سلسلہ جاری رہا تو وہ قانونی کارروائی کریں گے۔ ان کا کہنا تھا کہ پاکستان کرکٹ کی موجودہ صورتحال دیکھ کر دل ٹوٹتا ہے۔

انہوں نے مزید کہا کہ پاکستان کرکٹ ایک نقصان دہ چکر میں پھنس چکی ہے اور موجودہ مسائل کی جڑ عاقب جاوید ہیں۔ جیسن گلیسپی کے مطابق پاکستان کرکٹ میں ذمہ داریاں سنبھالنے سے قبل انہیں کئی معاملات کے حوالے سے خبردار بھی کیا گیا تھا۔