مِس ورلڈ مقابلے میں پہلی بار پاکستان کی شرکت، انیقہ معراج ملک کی نمائندگی کریں گی

پاکستان پہلی مرتبہ عالمی مقابلہ حسن مس ورلڈ میں شرکت کرنے جا رہا ہے، جہاں انیقہ معراج ملک کی نمائندگی کریں گی۔ انہیں مس ورلڈ پاکستان 2026 کا تاج پہنا دیا گیا ہے، جس کے ساتھ ہی وہ تاریخ میں پہلی پاکستانی خاتون بن گئی ہیں جو اس عالمی مقابلے میں پاکستان کی نمائندگی کریں گی۔

تاج پوشی کی تقریب لاہور کے فلیٹیز ہوٹل میں منعقد ہوئی، جہاں مس پاکستان یونیورسل 2022 ڈاکٹر شفق اختر اور مسٹر پاکستان ورلڈ عطااللہ گجر نے انیقہ معراج کو تاج پہنایا۔

مس ورلڈ کی جانب سے سوشل میڈیا پر کیے گئے اعلان کے مطابق انیقہ معراج 9 اگست سے 5 ستمبر 2026 تک ویتنام میں ہونے والے مس ورلڈ کے 75ویں سالانہ ایڈیشن میں پاکستان کی نمائندگی کریں گی۔

24 سالہ انیقہ معراج بزنس اور اکنامکس میں گریجویٹ ہیں اور اس وقت آڈٹنگ اور اکاؤنٹنگ میں ماسٹرز کر رہی ہیں۔ انہوں نے اپنے پیغام میں کہا کہ ان کا مقصد اسٹیٹ آتھرائزڈ پبلک اکاؤنٹنٹ بننا ہے، جبکہ وہ بچوں کے حقوق اور لڑکیوں کی تعلیم کے فروغ کے لیے بھی بھرپور آواز اٹھانا چاہتی ہیں تاکہ پاکستان کے روشن مستقبل میں اپنا کردار ادا کر سکیں۔

انیقہ معراج اس سے قبل بھی متعدد بین الاقوامی مقابلہ حسن میں پاکستان کی نمائندگی کر چکی ہیں، جن میں مس ارتھ، مس گلوبل، مس کازمو، مس ایکو انٹرنیشنل اور مس آورا انٹرنیشنل شامل ہیں۔ انہوں نے کوسووو میں منعقد ہونے والے "فریڈم آف دی ورلڈ" مقابلے میں چار اعزازات بھی اپنے نام کیے تھے۔

اگرچہ مس ورلڈ میں پاکستان کی یہ پہلی شرکت ہے، تاہم ملک اس سے قبل دیگر عالمی مقابلہ حسن میں حصہ لیتا رہا ہے۔ حالیہ برسوں میں ایریکا رابن اور روما ریاض نے مس یونیورس کے مقابلوں میں پاکستان کی نمائندگی کرتے ہوئے بین الاقوامی سطح پر توجہ حاصل کی تھی۔

پاکستان کی پہلی بار مس ورلڈ میں شرکت کو عالمی سطح پر ملک کی نمائندگی کے حوالے سے ایک اہم پیش رفت قرار دیا جا رہا ہے، جبکہ انیقہ معراج کی شرکت پر سوشل میڈیا پر بھی دلچسپی کا اظہار کیا جا رہا ہے۔