پاکستان نے یورو بانڈ کے ذریعے 3 ارب ڈالر حاصل کر لیے: وزیر خزانہ

اسلام آباد: وفاقی وزیر خزانہ محمد اورنگزیب نے کہا ہے کہ پاکستان نے یورو بانڈ کے ذریعے 3 ارب ڈالر حاصل کر لیے ہیں، جو ملکی تاریخ کا سب سے بڑا بانڈ ٹرانزیکشن قرار دیا جا رہا ہے۔

ایشیائی ترقیاتی بینک کی جانب سے ٹیکس اصلاحات سے متعلق منعقدہ تقریب سے خطاب کرتے ہوئے وزیر خزانہ نے کہا کہ 3 ارب ڈالر کے یوروبانڈ کا اجرا عالمی ریٹنگ ایجنسیوں اور بین الاقوامی سرمایہ کاروں کے پاکستان پر بڑھتے ہوئے اعتماد کا مظہر ہے۔

محمد اورنگزیب نے بتایا کہ اپریل 2025 سے اب تک پاکستان کی عالمی کریڈٹ ریٹنگ میں تین مرتبہ بہتری آئی ہے۔ ان کا کہنا تھا کہ یوروبانڈ کے لیے آرڈر بک اجرا کے حجم سے دوگنا رہی، جو عالمی سرمایہ کاروں کی بھرپور دلچسپی کو ظاہر کرتی ہے۔

وزیر خزانہ نے کہا کہ حکومت ٹیکس کا دائرہ کار بڑھانے اور ٹیکس نظام میں جامع اصلاحات پر عمل پیرا ہے، جبکہ ان اصلاحات کے نتیجے میں ٹیکس وصولیوں میں نمایاں بہتری آئی ہے۔

انہوں نے بتایا کہ ایشیا، مشرق وسطیٰ، یورپ اور امریکا کے سرمایہ کاروں نے پاکستانی یوروبانڈ میں دلچسپی ظاہر کی۔ ان کے مطابق عالمی سرمایہ کاروں کا پاکستانی معیشت پر اعتماد دوبارہ بحال ہوا ہے اور یہ اعتماد صرف موجودہ صورتحال تک محدود نہیں بلکہ پاکستان کے مستقبل سے بھی وابستہ ہے۔

محمد اورنگزیب نے کہا کہ پانچ سال اور 10 سالہ یوروبانڈز کے لیے بہتر قیمت حاصل کی گئی۔ انہوں نے واضح کیا کہ 3 ارب ڈالر کا یوروبانڈ اجرا کوئی عارضی یا اچانک فیصلہ نہیں بلکہ یہ تین سالہ درمیانی مدت کی جی ایم ٹی این حکمت عملی کا حصہ ہے۔

وزیر خزانہ کے مطابق حکومت بیرونی فنانسنگ میں قرضوں کی میچورٹیز بڑھانے اور رول اوور رسک کم کرنے کی حکمت عملی پر عمل کر رہی ہے۔

انہوں نے مزید کہا کہ پاکستان سکوک، ڈالر سیٹلڈ بانڈز اور پانڈا بانڈز سمیت مختلف ذرائع کے ذریعے اپنی بیرونی فنانسنگ کو متنوع بنانے کی کوشش کر رہا ہے تاکہ معیشت کو زیادہ مستحکم اور بیرونی قرضوں کے خطرات کو کم کیا جا سکے۔