ہانگ کانگ سکسز کے لیے پاکستانی ٹیم کا اعلان، عباس آفریدی کپتان برقرار

پاکستان کرکٹ بورڈ نے ہانگ کانگ سکسز ٹورنامنٹ کے لیے قومی ٹیم کا اعلان کردیا، عباس آفریدی قیادت کریں گے، قومی اسکواڈ 28 اکتوبر کو ہانگ کانگ روانہ ہوگا۔

پاکستان کرکٹ ٹیم کے ہانگ کانگ سکسز ٹورنامنٹ کے لیے اسکواڈ کا اعلان کردیا گیا ہے، جس میں عباس آفریدی کو قومی ٹیم کا کپتان برقرار رکھا گیا ہے۔

تین روزہ ہانگ کانگ سکسز ٹورنامنٹ 30 اکتوبر سے یکم نومبر تک کھیلا جائے گا، جس میں مجموعی طور پر 12 ٹیمیں حصہ لیں گی۔ ٹورنامنٹ میں شریک ٹیموں کو چار گروپس میں تقسیم کیا گیا ہے، جبکہ پاکستان کو گروپ سی میں شامل کیا گیا ہے۔

اعلان کردہ پاکستانی اسکواڈ میں کپتان عباس آفریدی کے علاوہ عبدالصمد، احمد دانیال، محمد عرفان خان، خواجہ نافع، محمد شہزاد اور سعد مسعود شامل ہیں۔ قومی ٹیم کے مینجر رضا کچلو ہوں گے۔

پاکستانی ٹیم 28 اکتوبر کو ٹورنامنٹ میں شرکت کے لیے ہانگ کانگ روانہ ہوگی، جہاں قومی کھلاڑی مختصر فارمیٹ کے اس دلچسپ ایونٹ میں اپنی صلاحیتوں کا مظاہرہ کریں گے۔

واضح رہے کہ پاکستان نے گزشتہ سال ہونے والے ہانگ کانگ سکسز ٹورنامنٹ میں کامیابی حاصل کی تھی۔ قومی ٹیم اس بار بھی ٹائٹل کے دفاع کے لیے میدان میں اترے گی۔