پاکستان کا خلائی تاریخ میں نیا سنگِ میل، پہلا پاکستانی خلا باز 25 نومبر کو خلا میں روانہ ہوگا

پاکستان خلائی تاریخ میں نیا سنگ میل عبور کرنے جا رہا ہے۔ پہلا پاکستانی خلا باز 25 نومبر کو چین کے شین ژو 24 مشن کے ذریعے تیانگونگ خلائی اسٹیشن روانہ ہوگا
اسلام آباد: پاکستان خلائی تاریخ میں ایک اہم سنگِ میل عبور کرنے کے قریب ہے، جہاں ملک کا پہلا خلا باز 25 نومبر کو چین کے شین ژو 24 مشن کے ذریعے خلا کے سفر پر روانہ ہوگا۔ یہ پیشرفت پاکستان اور چین کے درمیان خلائی تعاون کے ایک نئے دور کا آغاز قرار دی جا رہی ہے۔
اس تاریخی مشن کے لیے پاکستان کے دو امیدوار، محمد ذیشان علی اور خرم داؤد، چین میں خلائی تربیت مکمل کر چکے ہیں۔ پاکستان کے خلائی ادارے سپارکو کے مطابق دونوں امیدواروں میں سے ایک کو بطور پے لوڈ اسپیشلسٹ خلا میں بھیجا جائے گا۔
مشن کی خاص اہمیت یہ ہے کہ پاکستانی خلا باز چین کے تیانگونگ خلائی اسٹیشن پر پہنچنے والے پہلے غیر ملکی خلا باز ہوں گے۔ اس کامیابی سے نہ صرف پاکستان کی خلائی تحقیق کے شعبے میں صلاحیتوں کو فروغ ملے گا بلکہ پاک چین سائنسی اور تکنیکی تعاون بھی مزید مضبوط ہوگا۔
مشن کے لوگو میں پاکستان کے قومی پھول چنبیلی کو بھی شامل کیا گیا ہے، جو دونوں ممالک کے درمیان دوستی اور تعاون کی علامت ہے۔
یہ مشن پاکستان کے خلائی پروگرام کے لیے ایک تاریخی پیشرفت ثابت ہو سکتا ہے اور مستقبل میں خلائی تحقیق، سائنسی تجربات اور بین الاقوامی تعاون کے نئے مواقع پیدا کرنے میں اہم کردار ادا کر سکتا ہے۔
شائع ہوا: 19 نومبر، 2026 کو 04:42 AM
آخری تدوین: 19 نومبر، 2026



