پی سی بی کا سینٹرل کنٹریکٹ سسٹم تبدیل، 2026 سے نیا 5 ٹریک فارمیٹ نافذ

پاکستان کرکٹ بورڈنے سینٹرل کنٹریکٹس کے نظام میں بڑی تبدیلیوں کا اعلان کرتے ہوئے 2026 کے کنٹریکٹ سائیکل سے نیا پانچ ٹریک فارمیٹ متعارف کرانے کا فیصلہ کر لیا ہے۔ نئے نظام کے تحت روایتی اے، بی، سی اور ڈی کیٹیگریز ختم کر دی گئی ہیں اور اب کھلاڑیوں کی درجہ بندی ان کے متعلقہ فارمیٹ کی کارکردگی کی بنیاد پر کی جائے گی۔

چیئرمین پی سی بی محسن نقوی کی زیر قیادت متعارف کرائے گئے نئے ماڈل کے مطابق ٹریک اے بی میں ٹیسٹ اور ون ڈے کرکٹرز، ٹریک اے میں ریڈ بال اسپیشلسٹ، ٹریک بی سی میں ون ڈے اور ٹی ٹوئنٹی کھلاڑی جبکہ ٹریک ڈی میں ٹی ٹوئنٹی اور فرنچائز اسپیشلسٹ شامل ہوں گے۔

پی سی بی کے مطابق نئے نظام میں ہر کھلاڑی کا موازنہ صرف اپنے ہی فارمیٹ کے دیگر کرکٹرز سے کیا جائے گا۔ اس کے علاوہ ٹیسٹ کرکٹرز کو دنیا بھر کی ریڈ بال اور فرسٹ کلاس لیگز میں شرکت کی اجازت بھی دی جائے گی تاکہ ان کی صلاحیتوں میں مزید نکھار آ سکے۔

سینٹرل کنٹریکٹ حاصل کرنے کے لیے کھلاڑیوں کو تین مختلف مراحل سے گزرنا ہوگا، جن میں میڈیکل اسسمنٹ، ڈومیسٹک کرکٹ میں شرکت اور مجموعی کارکردگی کا جائزہ شامل ہوگا۔

لاہور میں پریس کانفرنس کرتے ہوئے چیئرمین پی سی بی محسن نقوی نے کہا کہ نئے نظام پر کھلاڑیوں کی جانب سے مثبت ردعمل سامنے آیا ہے اور تمام اسٹیک ہولڈرز کو اس حوالے سے تفصیلی بریفنگ دی جا چکی ہے۔ ان کا کہنا تھا کہ اب یہ شکایت نہیں رہے گی کہ کسی کو اے یا بی کیٹیگری نہیں ملی، کیونکہ پورا نظام فارمیٹ کی بنیاد پر ترتیب دیا گیا ہے۔

محسن نقوی نے مزید کہا کہ کھلاڑیوں کی ڈومیسٹک کرکٹ میں شرکت کو لازمی بنایا جا رہا ہے اور جو پلیئرز ڈومیسٹک کرکٹ سے دور رہیں گے، انہیں اس کے نتائج کا سامنا کرنا پڑ سکتا ہے۔

اس موقع پر پی سی بی کے ڈائریکٹر ہائی پرفارمنس عاقب جاوید نے کہا کہ پرانے کیٹیگری سسٹم کی جگہ پانچ نئے فارمیٹ ٹریکس متعارف کرانا وقت کی ضرورت تھی۔ ان کے مطابق ٹیسٹ کرکٹ کو خصوصی اہمیت دی گئی ہے تاکہ ریڈ بال کرکٹ کو فروغ مل سکے اور کھلاڑی اپنے مخصوص فارمیٹ کے مطابق واضح راستہ اختیار کر سکیں۔

وائٹ بال ہیڈ کوچ مائیک ہیسن کا کہنا تھا کہ عالمی کرکٹ کا منظرنامہ تیزی سے تبدیل ہو رہا ہے اور اسی تبدیلی کو مدنظر رکھتے ہوئے نیا فریم ورک تیار کیا گیا ہے۔ انہوں نے اس دستاویز کو مستقبل کی ضروریات سے ہم آہنگ قرار دیتے ہوئے کہا کہ اس سے ٹیسٹ اور فرسٹ کلاس کرکٹ کو بھی تقویت ملے گی۔

دوسری جانب پی سی بی کے میڈیکل ہیڈ ڈاکٹر جاوید مغل نے کہا کہ جدید کرکٹ میں فٹنس کی اہمیت بہت بڑھ چکی ہے، اسی لیے تمام کھلاڑیوں کی جامع میڈیکل اسسمنٹ کی گئی ہے اور اس نئے طریقہ کار کو حتمی شکل دینے میں کئی ماہ صرف کیے گئے ہیں۔

پی سی بی کا کہنا ہے کہ نیا سینٹرل کنٹریکٹ سسٹم 2026 سے باقاعدہ طور پر نافذ العمل ہوگا اور اس کا مقصد کھلاڑیوں کی کارکردگی، فٹنس اور ڈومیسٹک کرکٹ سے وابستگی کو مزید مؤثر بنانا ہے۔