بڑھتی آبادی کے پیش نظر ہاؤسنگ سیکٹر میں اصلاحات ناگزیر ہیں: وزیراعظم شہباز شریف

وزیراعظم کی زیر صدارت ہاؤسنگ سیکٹر میں اصلاحات سے متعلق جائزہ اجلاس منعقد ہوا، جس میں کم آمدنی والے طبقے کیلئے رہائش کی فراہمی، سستے گھروں کے منصوبوں اور نجی شعبے کی حوصلہ افزائی پر تفصیلی غور کیا گیا۔

وزیراعظم نے کہا کہ عوامی سہولیات کی بہتری حکومت کی ترجیحات میں شامل ہے، جبکہ بڑھتی آبادی کی وجہ سے زرعی زمین پر بڑھتے دباؤ سے نمٹنے کیلئے مؤثر حکمت عملی اختیار کرنا ضروری ہے۔

انہوں نے ہدایت کی کہ ہاؤسنگ سیکٹر کے تمام معاملات کو ڈیجیٹائز اور آٹو میٹ کیا جائے تاکہ شفافیت کو فروغ دیا جا سکے۔ وزیراعظم کے مطابق بیرون ملک سرمایہ کاروں کو راغب کرنے کیلئے ہاؤسنگ سیکٹر کو باقاعدہ ضابطہ کار کے تحت لانا بھی ناگزیر ہے۔

اجلاس میں بریفنگ دیتے ہوئے حکام نے بتایا کہ معتبر سرمایہ کاروں اور ڈویلپرز کو سہولیات فراہم کرنے کیلئے ریگولیٹری فریم ورک کو آسان بنایا جائے گا، جبکہ ہاؤسنگ اور ڈیولپمنٹ سیکٹر سے وابستہ افراد کیلئے ایس ای سی پی میں رجسٹریشن لازمی قرار دینے کی تجویز بھی زیر غور ہے۔

بریفنگ میں مزید بتایا گیا کہ شہروں کے بے ترتیب پھیلاؤ کو روکنے کیلئے نئی حکمت عملی تیار کی جائے گی، جبکہ بڑے شہروں میں اونچی عمارتوں اور ورٹیکل ایکسپینشن کی حوصلہ افزائی کی جائے گی۔

اجلاس میں ماسٹر ٹاؤن پلاننگ، ون ونڈو سسٹم کے قیام اور ڈویلپرز و خریداروں کے حقوق کے تحفظ سے متعلق تجاویز بھی پیش کی گئیں۔ وزیراعظم نے ان تجاویز پر صوبوں کے ساتھ مشاورت کی ہدایت جاری کر دی۔