وزیر اعظم شہباز شریف 4 روزہ دورے پر چین پہنچ گئے، صدر اور چینی ہم منصب سے اہم ملاقاتیں کریں گے

شہباز شریف اپنے چار روزہ سرکاری دورے پر چین پہنچ گئے ہیں، جہاں وہ چینی قیادت سے اہم ملاقاتیں کریں گے اور پاک چین تعلقات، اقتصادی تعاون اور علاقائی صورتحال پر تبادلہ خیال کریں گے۔

وزیر اعظم اپنے دورے کے پہلے مرحلے میں چین کے شہر ہانگژو پہنچے، جہاں شیاؤ شین ایئرپورٹ پر ژیجیانگ صوبے کے نائب گورنر شو وینگوانگ، پاکستان میں چین کے سفیر جیانگ زائیڈونگ اور چین میں پاکستان کے سفیر خلیل ہاشمی نے ان کا استقبال کیا۔

دورے کے دوران شہباز شریف ژیجیانگ صوبے کے پارٹی سیکرٹری سے ملاقات کریں گے جبکہ چین پاکستان اقتصادی راہداری فیز 2 کے تحت منعقدہ بزنس فورم میں بھی شرکت کریں گے۔ فورم کے موقع پر مختلف چینی کمپنیوں کے سربراہان اور سرمایہ کار وزیر اعظم سے ملاقاتیں کریں گے۔

وزیر اعظم مختلف معاہدوں اور مفاہمتی یادداشتوں پر دستخط اور تبادلے کی تقریب میں بھی شریک ہوں گے۔ اس کے علاوہ وہ علی بابا گروپ کے ہیڈکوارٹر کا دورہ کریں گے، جہاں ڈیجیٹل معیشت، ای کامرس اور ٹیکنالوجی تعاون کے امکانات پر گفتگو متوقع ہے۔

دورے کے اگلے مرحلے میں وزیر اعظم بیجنگ جائیں گے جہاں وہ اپنے چینی ہم منصب اور شی جن پنگ سے ملاقاتیں کریں گے۔ ملاقاتوں میں دوطرفہ تعلقات، اقتصادی شراکت داری، علاقائی امن و استحکام اور سرمایہ کاری کے فروغ پر تبادلہ خیال کیا جائے گا۔

وزیر اعظم پاک چین سفارتی تعلقات کے 75 سال مکمل ہونے کی تقریبات میں بھی شرکت کریں گے جبکہ وہ چائنہ اکیڈمی آف ایگری کلچر سائنسز کا دورہ بھی کریں گے۔

وزیر اعظم کے ہمراہ نائب وزیر اعظم اسحاق ڈار، وفاقی وزرا احسن اقبال، عطا تارڑ، شزا فاطمہ خواجہ اور معاون خصوصی طارق فاطمی بھی موجود ہیں۔