دفاع کیلئے وسائل کی فراہمی حکومت کی اولین ترجیح ہے، وزیراعظم شہباز شریف

اسلام آباد: وزیراعظم شہباز شریف نے کہا ہے کہ موجودہ معاشی چیلنجز کے باوجود دفاع کے لیے وسائل کی فراہمی حکومت کی اولین ترجیح ہے، جبکہ روزگار کے مواقع پیدا کرنا، برآمدات میں اضافہ اور معیشت کو مستحکم بنانا وفاق اور صوبوں کی مشترکہ ذمہ داری ہے۔

قومی اقتصادی کونسل (این ای سی) کے اجلاس سے خطاب کرتے ہوئے وزیراعظم نے کہا کہ بجٹ کی تیاری کے حوالے سے صوبوں کے ساتھ کئی ہفتوں سے مشاورت جاری ہے اور وہ اس سلسلے میں تمام وزرائے اعلیٰ کی بھرپور معاونت اور تعاون پر ان کے مشکور ہیں۔

انہوں نے کہا کہ وفاق اور صوبوں نے عوامی مفاد اور معاشی ترقی کے لیے اہم اور بہترین فیصلے کیے ہیں۔ مشکل معاشی حالات کے باوجود تمام متعلقہ اداروں اور حکومتوں نے مل کر عالمی مالیاتی فنڈ (آئی ایم ایف) پروگرام پر عمل درآمد یقینی بنانے کی کوشش کی ہے۔

وزیراعظم نے بتایا کہ انہوں نے گزشتہ رات آئی ایم ایف کی منیجنگ ڈائریکٹر سے تفصیلی گفتگو کی، جس میں عالمی مالیاتی فنڈ کی سربراہ نے پاکستان کی معاشی بہتری اور اصلاحاتی اقدامات کے لیے کی جانے والی مخلصانہ کوششوں کو سراہا۔

شہباز شریف کا کہنا تھا کہ روزگار کے نئے مواقع پیدا کرنا، برآمدات میں اضافہ، پیداواری صلاحیت کو بہتر بنانا اور معاشی استحکام حاصل کرنا ہم سب کی مشترکہ ذمہ داری ہے۔ انہوں نے اس بات پر زور دیا کہ دہشت گردی کے چیلنج سے مؤثر انداز میں نمٹنے کے لیے مناسب وسائل درکار ہیں۔

وزیراعظم نے کہا کہ قوم اور سیکیورٹی فورسز کی بے مثال قربانیوں کی بدولت دہشت گردی کے ناسور کا خاتمہ یقینی بنایا جائے گا۔ انہوں نے اس عزم کا اعادہ کیا کہ حکومت معاشی مشکلات کے باوجود زیادہ سے زیادہ وسائل پیدا کرنے اور قومی دفاع کو مضبوط بنانے کے لیے تمام ضروری اقدامات جاری رکھے گی۔

انہوں نے مزید کہا کہ باہمی اتحاد، اتفاق اور مشترکہ قومی حکمت عملی کے ذریعے دہشت گردی کا مکمل خاتمہ ممکن بنایا جا سکتا ہے اور پاکستان کو معاشی و دفاعی لحاظ سے مزید مستحکم کیا جا سکتا ہے۔