شہزادہ ہیری کا خاندان سمیت رواں ماہ امریکا سے برطانیہ واپسی کا فیصلہ

لندن: برطانیہ کے شہزادہ ہیری نے تقریباً 6 سال امریکا میں قیام کے بعد اپنی اہلیہ میگھن مارکل اور بچوں سمیت رواں ماہ برطانیہ واپس آنے کا فیصلہ کیا ہے۔ میڈیا رپورٹس کے مطابق شہزادہ ہیری نے اپنے والد بادشاہ چارلس کو بھی اچانک وطن واپسی کے منصوبے سے آگاہ کردیا ہے۔

رپورٹس کے مطابق 41 سالہ شہزادہ ہیری نے اتوار کے روز بادشاہ چارلس کو اپنے برطانیہ واپسی کے منصوبے سے آگاہ کیا۔ تاہم یہ امکان ظاہر کیا جا رہا ہے کہ وطن واپسی کے باوجود ہیری اور میگھن کے شاہی خاندان میں درجے یا حیثیت میں کوئی تبدیلی نہیں کی جائے گی۔

چند برس قبل طے کیے گئے انتظامات کے تحت شہزادہ ہیری اور میگھن مارکل شاہی خاندان کے ایسے افراد ہی رہیں گے جو سرکاری شاہی امور انجام نہیں دیں گے۔

میڈیا رپورٹس کے مطابق جوڑے کے 7 سالہ بیٹے آرچی اور 5 سالہ بیٹی للی بیٹ نے برطانیہ کے ایک اسکول میں داخلہ لے لیا ہے اور وہیں اپنی تعلیم مکمل کریں گے۔ تاہم یہ واضح نہیں کہ شہزادہ ہیری اور ان کا خاندان برطانیہ میں مستقل طور پر کہاں رہائش اختیار کرے گا۔

شہزادہ ہیری اور میگھن مارکل شاہی خاندان سے اختلافات کے بعد تقریباً چھ سال قبل برطانیہ چھوڑ کر امریکا منتقل ہوگئے تھے۔ اس دوران دونوں نے شاہی فرائض انجام دینے سے دستبرداری اختیار کرلی تھی۔

اس وقت کی ملکہ الزبتھ دوم نے بھی ایک بیان میں واضح کیا تھا کہ ہیری اور میگھن شاہی خاندان کے فعال ارکان کی حیثیت سے عوامی خدمات انجام نہیں دے سکیں گے۔ بعد ازاں شہزادہ ہیری کو ان کے اعزازی فوجی عہدوں سے بھی محروم کردیا گیا تھا۔

فی الحال شہزادہ ہیری کیلیفورنیا میں مقیم ہیں، تاہم رپورٹس میں دعویٰ کیا گیا ہے کہ میگھن مارکل امریکا کے بااثر سماجی حلقوں میں اپنی متوقع جگہ بنانے میں کامیاب نہیں ہوسکیں۔

شہزادہ ہیری کی برطانیہ واپسی کی اصل وجہ تاحال واضح نہیں ہوسکی اور نہ ہی یہ معلوم ہے کہ وطن واپسی کے فیصلے میں کس کا کردار ہے۔