قطر نے آبنائے ہرمز میں آئل ٹینکر پر حملے کا ذمہ دار ایران کو قرار دے دیا

دوحہ: قطر نے آبنائے ہرمز سے گزرنے والے ایک آئل ٹینکر پر حملے کی شدید مذمت کرتے ہوئے ایران کو اس واقعے کا ذمہ دار قرار دیا ہے۔

قطری وزارت خارجہ کے ترجمان ماجد الانصاری نے سوشل میڈیا پلیٹ فارم ایکس پر جاری بیان میں کہا کہ آئل ٹینکر کو نشانہ بنانا بین الاقوامی بحری جہاز رانی، عالمی توانائی کی فراہمی اور علاقائی سلامتی کے خلاف ایک جارحانہ اقدام ہے۔

انہوں نے کہا کہ یہ حملہ بین الاقوامی قانون، خصوصاً بین الاقوامی آبی گزرگاہوں میں آزادانہ اور محفوظ بحری آمدورفت سے متعلق اصولوں اور قوانین کی کھلی خلاف ورزی ہے۔

قطری وزارت خارجہ کے مطابق آبنائے ہرمز جیسے اہم بحری راستے پر اس نوعیت کے حملے نہ صرف خطے کے امن و استحکام بلکہ عالمی تجارت اور توانائی کی سپلائی کے لیے بھی سنگین خطرات پیدا کرتے ہیں۔

بیان میں عالمی برادری سے مطالبہ کیا گیا کہ بین الاقوامی بحری راستوں کی سلامتی یقینی بنانے اور خطے میں کشیدگی کم کرنے کے لیے مؤثر اقدامات کیے جائیں، تاکہ عالمی تجارت اور توانائی کی ترسیل بلا تعطل جاری رہ سکے۔