رمشا خان کی بہن کی شادی، نکاح کے انداز نے سوشل میڈیا پر نئی بحث چھیڑ دی

پاکستانی اداکارہ رمشا خان کی بہن علیشا خان کی شادی کی تقریبات سوشل میڈیا پر خاصی توجہ حاصل کر رہی ہیں، تاہم نکاح کے منفرد انداز نے صارفین کے درمیان نئی بحث چھیڑ دی ہے۔

علیشا خان کی نکاح کی تقریب دن کے وقت منعقد ہوئی، جس میں روایتی انداز میں ’’قبول ہے‘‘ کہنے کے بجائے انگریزی زبان میں رضامندی کا اظہار کیا گیا۔ نکاح کی تقریب کی ویڈیوز سوشل میڈیا پر وائرل ہونے کے بعد صارفین کی جانب سے مختلف آرا سامنے آنے لگیں۔

کچھ صارفین نے سوال اٹھایا کہ پاکستانی شادی کی تقریب میں نکاح کی رضامندی انگریزی زبان میں کیوں ظاہر کی گئی، جبکہ بعض صارفین نے روایتی ’’قبول ہے‘‘ کے انداز کو زیادہ خوبصورت اور باوقار قرار دیا۔

سوشل میڈیا پر بعض صارفین نے تقریب کے انداز اور دلہن کے انگریزی لہجے پر بھی طنزیہ تبصرے کیے، جبکہ کچھ لوگوں نے اسے ذاتی انتخاب قرار دیتے ہوئے تنقید سے گریز کرنے کی رائے دی۔

دوسری جانب اداکارہ رمشا خان نے بہن کی شادی کی تقریبات کے دوران خود کو میڈیا اور سوشل میڈیا کی توجہ سے دور رکھا۔ اداکارہ نے اپنے شوہر خوشحال خان کے ہمراہ شادی کی تقریبات کی تصاویر یا ویڈیوز بھی سوشل میڈیا پر شیئر نہیں کیں۔