امریکا کے 250ویں یومِ آزادی پر سفیر پاکستان رضوان سعید شیخ کا تہنیتی پیغام، پاک امریکا تعلقات کو مزید مضبوط بنانے پر زور

(واشنگٹن) امریکا کے 250ویں یومِ آزادی کے موقع پر امریکہ میں پاکستان کے سفیر رضوان سعید شیخ نے حکومتِ پاکستان اور پاکستانی عوام کی جانب سے امریکی حکومت اور عوام کو دلی مبارکباد پیش کرتے ہوئے دونوں ممالک کے درمیان دیرینہ تعلقات کو مزید مضبوط بنانے کے عزم کا اظہار کیا۔

اپنے تہنیتی پیغام میں سفیر پاکستان نے کہا کہ امریکا کی 250 سالہ تاریخ آزادی، جمہوریت، ثابت قدمی، جدت اور قومی عزم کی روشن مثال ہے۔ انہوں نے کہا کہ پاکستان اور امریکا آزادی اور جمہوریت جیسی مشترکہ اقدار کے حامل ممالک ہیں، جبکہ پاکستان بھی انہی اعلیٰ اصولوں کی بنیاد پر معرضِ وجود میں آیا۔

رضوان سعید شیخ نے کہا کہ پاک امریکا تعلقات گزشتہ آٹھ دہائیوں کے دوران متعدد آزمائشوں سے گزرنے کے باوجود مضبوط رہے ہیں اور دونوں ممالک کی شراکت داری نہ صرف دوطرفہ تعلقات بلکہ عالمی سطح پر بھی ہمیشہ نتیجہ خیز ثابت ہوئی ہے۔

انہوں نے کہا کہ دونوں ممالک کی اعلیٰ قیادت کے درمیان حالیہ رابطوں اور مختلف عالمی و علاقائی امور پر یکساں نقطۂ نظر نے دیرپا شراکت داری کے لیے نئے مواقع پیدا کیے ہیں، جو مستقبل کے لیے نہایت حوصلہ افزا ہیں۔

سفیر پاکستان نے زور دیا کہ معدنیات، توانائی، آئی ٹی، زراعت، سرمایہ کاری اور تجارت جیسے شعبوں میں تعاون کو مزید فروغ دے کر معاشی شراکت داری کو نئی بلندیوں تک پہنچایا جا سکتا ہے۔

انہوں نے امریکہ میں مقیم پاکستانی کمیونٹی کے کردار کو سراہتے ہوئے کہا کہ پاکستانی نژاد امریکی نہ صرف امریکہ کی ترقی میں نمایاں کردار ادا کر رہے ہیں بلکہ دونوں ممالک کے درمیان مضبوط پل کی حیثیت بھی رکھتے ہیں۔

اس تاریخی موقع پر پاکستانی کمیونٹی کی جانب سے امریکی عوام کے لیے ایک منفرد تحفہ بھی پیش کیا گیا۔ معروف موسیقار سراج نارسی اور ان کی ٹیم نے پاکستانی روایتی سازوں پر امریکی قومی ترانے کی خصوصی دھن ترتیب دے کر حکومت اور عوامِ امریکا کے نام پیش کی۔

سفیر پاکستان نے اس کاوش کو پاک امریکا تعلقات کے ماضی، حال اور روشن مستقبل کی علامت قرار دیتے ہوئے کہا کہ یہ تحفہ امریکہ میں مقیم پاکستانی کمیونٹی کے خلوص، محبت اور دونوں ممالک کے درمیان مضبوط تعلقات کا عملی اظہار ہے۔

انہوں نے امریکی قومی ترانے کو پاکستانی روایتی سازوں پر پیش کرنے کی منفرد اور شاندار کاوش پر سراج نارسی اور ان کی پوری ٹیم کو خراجِ تحسین بھی پیش کیا۔