سارہ خان اور فلک شبیر کے ہاں دوسری بیٹی کی پیدائش، ننھی رانیہ فلک کی پہلی جھلک سامنے آگئی

پاکستان شوبز انڈسٹری کی معروف اداکارہ سارہ خان اور معروف گلوکار فلک شبیر کے گھر دوسری بیٹی کی آمد ہوئی ہے، جس کے بعد سوشل میڈیا پر مبارکبادوں کا سلسلہ جاری ہے۔

اداکارہ نے اپنے آفیشل انسٹاگرام اکاؤنٹ پر نومولود بیٹی کی تصویر شیئر کرتے ہوئے مداحوں کو خوشخبری سنائی۔ سارہ خان اور فلک شبیر نے اپنی ننھی بیٹی کا نام “رانیہ فلک” رکھا ہے۔

پوسٹ منظرعام پر آتے ہی مداحوں اور شوبز شخصیات نے خوشی کا اظہار کرتے ہوئے نیک تمناؤں اور دعاؤں سے بھرے پیغامات شیئر کیے۔ اداکار سمیع خان، شگفتہ اعجاز اور نور ظفر خان سمیت کئی معروف فنکاروں نے جوڑے کو دوسری بیٹی کی پیدائش پر مبارکباد دی۔

واضح رہے کہ سارہ خان پاکستان کی مقبول ترین اداکاراؤں میں شمار کی جاتی ہیں اور وہ انسٹاگرام پر ایک کروڑ سے زائد فالوورز رکھنے والی نمایاں پاکستانی شخصیات میں شامل ہیں۔ انہوں نے متعدد کامیاب ڈراموں میں اپنی شاندار اداکاری سے مداحوں کے دل جیتے۔

یاد رہے کہ سارہ خان اور فلک شبیر کی پہلی بیٹی کا نام “الیانا فلک” ہے، جبکہ اب “رانیہ فلک” کی آمد نے ان کے گھر کی خوشیوں میں مزید اضافہ کر دیا ہے۔