سعود کا نادیہ خان پر تنقید، انڈسٹری میں نفرتیں پھیلانے کا الزام

ویب ڈیسک: پاکستان شوبز انڈسٹری کے سینئر اداکار سعود نے اداکارہ اور میزبان نادیہ خان پر تنقید کرتے ہوئے کہا ہے کہ انہوں نے انڈسٹری میں کافی فساد پیدا کیا ہے۔

ایک نجی ٹی وی پروگرام میں گفتگو کرتے ہوئے سعود سے سوال کیا گیا کہ آج کل پوڈکاسٹس میں شہرت حاصل کرنے کے لیے پرانی باتیں اور متنازع معاملات زیرِ بحث لائے جاتے ہیں، اس بارے میں ان کی کیا رائے ہے؟

سعود نے جواب میں کہا کہ آج کل یہ رجحان بڑھ رہا ہے اور ایک دوسرے کو عزت دینے کا رویہ کم ہوتا جا رہا ہے۔ ان کے مطابق انہیں ایسے انٹرویوز پسند نہیں جن میں متنازع سوالات کرکے لوگوں کے درمیان اختلافات پیدا کیے جائیں۔

اداکار نے نادیہ خان کا نام لیتے ہوئے کہا کہ انہوں نے ایک بزنس مین کی بیٹی سے بھی سوالات کیے، جبکہ ماضی میں اداکار ہمایوں سعید اور اداکارہ عتیقہ اوڈھو کے حوالے سے بھی باتیں کیں۔ سعود کے بقول ایسی گفتگو لوگوں کے دلوں میں ایک دوسرے کے لیے نفرت پیدا کرتی ہے۔

سعود نے مزید کہا کہ پاکستانی شوبز انڈسٹری مجموعی طور پر اچھی ہے اور اس طرح کے تنازعات کچھ وقت کے لیے سامنے آتے ہیں، تاہم چند روز بعد ان کی شدت کم ہو جاتی ہے۔